Ulla Pirttijärvi vuoiŋŋalaš dálkkas

ÁRVVOŠTALLAN: Dan Robert Larsen

Ulla Pirttijärvi gohčoduvvo okta buoremus sápmelaš ártisttain dán áigái. Nu máidnu Frode Fjellheim skearrofitnodat "Vuolie" ohcejohkalaš juoigi ja Lappi leanadáiddára Ulla Pirttijärvi musihka.

Ođđa skearruinis "Áibbašeapmi" Pirttijärvi ii eisege heahpašuhte dáid sániid. Son baicce nanne skearrobuvttadeaddji Frode Fjellheim rámi ja addá sániide čiekŋalet sisdoalu. Boađusin musihkalaš seaguhusas, masa gullá Ulla čáppa juoigan- ja lávlonjietna ovttas feara makkár čuojanasaiguin, lea skearru mii lea njulgestaga illu sillui dahje jo juogalágán vuoiŋŋalaš dálkkas.

Luohti lea vuođđun Ulla Pirttijärvi musihkkii. "Áibbašeami" skearrus lea dát vuohkkasit seaguhuvvon nugohčoduvvon máilmmemusihkain, popain ja jazzain. Musihkas vuhttojit čielgasit sihke Frode Fjellheim ja Transjoik inspirášuvdna, ja dát lea mielde loktemin musihka, iige guđege láhkái leat mielde bilideamen dan.

Fjellheim ja su čuojaheaddjiid musihkalaš "suorbmasajit" bohtet ovdan buot lávlagiin. Ja danne leage várra Pirttijärvi gudnejahttán buvttadeaddjis luđiin "Frovden vuolie".

Ulla Pirttijärvi lea bajásšaddan smávva meahccegilážis Áŋŋelis. Doppe árrat fuobmájedje nieiddaža musihkalaš attáldagaid. Ja Ulla searvvaige vuos jovkui Áŋŋel Nuorat ja dasto son lei okta golmma lahtus Áŋŋel Nieiddain. Das rájes lea son sakka ahtanuššan ja "Áibbašeapmi" lea Ulla Pirttijärvi goalmmát soloskearru. Su guokte vuosttaš skearru leat sakka máidnojuvvon musihkkaárvvoštalliid beales. "Áibbašeapmi" lea almmatge dán árvvoštalli mielas su buoremus skearru goassige.

Dán árvvoštallamis lea olu rápmi ja čáppa sánit. Muhto mii de dasto lea skearru heajut bealli? Vástádus dasa lea čielggas dego ájačáhci: Ii mihkkige! Luođit, lávlagat ja musihkka ahtanuššá ja stuorru guldaleamis nubbái.

Danne ferten dás loahpas vel ávžžuhit du gii gulat dán árvvoštallama ja gii liikot musihkkii, mii orro dego stuorra vuoiŋŋalaš vásáhus: Viehkal oastit!

Árvosátni: Guđeš

Gula árvvoštallama