Maŋimuš ođđasat sámegillii

Sámediggedirektevra ii áiggo šat joatkit

Sametinget baksiden (Foto: Elvi Rosita Norvang/NRK)

– Direktevrabargu gáibidii beare olu áiggi. Dál áiggun skihpáriid ja bearraša vuoruhit ovdalii, čilge Heidi Salmi.

Marit Elin Kemi

Publisert 07.12.2007 13:49. Oppdatert 07.12.2007 13:50.

Skriv ut
Del/tips

50 jahkásaš Heidi Salmi lea bargan beal guđat jagi Norgga Sámedikki direktevran. Ikte almmuhii Sámedikki bargiide ahte ii oza šat barggu nuppi áigodahkii.

Skandálaiguin gievrrui

Dán doaimmas leat maid leamaš ollu stoaittat ja mediačállosat. Sámedikki poastajournalain suđđe dehálaš dieđut mat bohte Norgga ráđđehusas. Mielbargiidiskkadeapmii ii ge lean vuogas go muhtin bargit čuoččuhedje ahte ásahusas givssidit nuppiid. Mediat maid duođaštedje ahte ásahusas leat váilevaš rutiinnat.

Salmi oaivvilda ahte stoaittat ja moaitagat gievrudahttejedje su.

– Ferte rehkenastit ahte dákkár barggus lea nu, muhto olmmoš gievru vuostebiekka vuostá.

Balai stirdut

Son lohká ásahusa ovdánan maŋemus guđa jagis. Salmi lea maid dan oaivilis ahte ii leat vuogas jos jođiheaddjit jotket beare guhká doaimmaineaset.

-Ballen stirdut dien barggus, ja de in smiehtaše šat ovdánahttima birra. Lea dearvvašlaš molsut jođiheaddji .

Presideanta rámida Salmi

Sámediggepresideanta Egil Olli lea duhtavaš su bargguiguin.

Son lea bargan buori barggu jođiheamis sámedikki. Son lea leamaš olu dolaid siste, muhto liikka lea bisson čuožžut. Dát čájeha ahte son lea leamaš nanu jođiheaddji, lohká Olli.

Dál álgá Heidi Salmi seniorráđđeaddivirgái Sámediggái.