PÅ NORSK:
(Muitaleaddji: Nils Johansen Eira)
Na, mu namma lea Nils Eira, gohčodit gal maid Iskon-Máhte Niillasin.
Mun lean goit gullan dáin iežamet boares olbmuin dalle, dat lea várra die loahppasoađi áigge, soahtejagiin: Luottain go barge diekko Áisároaivvi bokte, ja dat ledje juo váldán ruoššafáŋggaid gitta de. Daid dat barggahedje, dat ledje várra mat barge dainna luottain, nu go mun lean ipmirdan. Ja dađi mielde dieđusge dat eai nagot šat bargat, ja gal dieđos skihppájedje.
Duiskalaččat ledje juo ráhkadan dasa harcamuora, ja das dat harco juohke beaivve. Mu eadni lea muitalan, sii ledje nieiddašlágažat dalle: Na sii láveje mannat juohke beaivve geahččat, ja lei šaddan nu dábálažžan, eai sii dal duon atnán maninge, go harco daid ruoššaid. Ja go liikat (jámehat) leat heaŋgán das, de bálkestedje daid dohko luotta vuollái. Dat šadde dan luotta vuollái, muhto gal hal dieđus daid gal leat burgan doppe eret maŋŋel go ráfi bođii.
Duoppe gal lávejit muitalit dego duokko Háhttajot-šaldi, dat hal lei maid dakkar báiki gos harco ruoššaid. Ja nu lea ge jo nammasan vissa "Ruoššadievván" dat. Doppe mun in doaivvo leat gávdnan gal buot ruoššaid. Lea dainnalágiin, dakko áidi manná rasta luotta. Ja oainnát báhcá verrát dakko, ja lávejit šaddat lávostallat das go eallu lea dakko lahka, gohkket dan verráha.
Muhto lea dakkár ahte ii hal doppe datte riekta bálle dan lávus. Oažžu gal leat nu goalki, muhto uvssoha fáhkkestaga šlivge. Ja nie lávejit muitalit. Muhtumin ii buole dolla vaikko mii de livččii. Mii gal leat gávnnahan dat leat dieđus doppe eatnama vuolde, vaikko leš hávdi, jur dakko dan lávu vuolde, ii hal dan dieđe šat.
Dakko goit birra oidnojit, die leat gal hávddit, muhto eat mii leat gal dette šaddan burgit, geahččat mii doppe lea. Doppe ii gal leat oađđinráfi. Lávejit dáččat maid muitalit diekko dan Háhttajot-šaldi bokte lea dakkár, mii biilii maid báhkke. Bisána biila, ja gal dat juo boahtá biilii ja čuovvu moadde gilomettara. Ja máŋgii leat goit oaidnán maid nie go boahtá dan šaldi vuole olmmoš, boahtá luotta nala, ja de šaddet bisánit vai eai vuoje dan olbmo nala. Muhto ii hal dat bisán, manná fas rastá luotta ja fas dohko šaldi vuollái. Dan leat hui máŋggas muitalan.