PÅ NORSK:
(Muitaleaddji: Per L. Boine)
Njávdánvuonas lea stuora, čáhppes bákti man olbmot gohčodit Áhkubáktin. Ja Áhkku lei sin deaŧááleamos ipmiliid searvves dolin. Son dat sivdnidii visot olbmuid bargguid ja veahkehii dakkár olbmuid, maidda liikui. Jus dasa oaffarušai ja attii oasi sállašis, de vissásit bivdu lihkustuvai bures. Nu doivo olbmot dolin. Ja sii dávjá adde Áhkkui oasi sállašis. Guoli, bierggu dahje čorvviid. Ja vel dán áigge ge oaidná dan bávtti duohken bázahusaid: Doppe leat leamaš hirbmat stuora lohku čoarvvit, máid olbmot lea addán sin dološ ipmilii.
Oktii ledje golbma noaiddi vuolgán vuona rastá, sii áigo bivdit gottiid dan Áhkkuváris. Ja sii godde maid. De sii mearridedje addit Áhkkubávtti sieidái oasi sin sállašis. Álge guoddit golbma bohcco dohko guvlui. Ja vaikko sieidi leai nuppe bealde vuona, de sii vázze. Dat ledje buohkat nu stuorra noaiddit ahte máhtte vázzit meara čázi alde.
Seammá áiggis leai doppe báhppa man namma lei Trifon. Son dat lei guhte ráhkadii girku dohko Boris Gleb gillái ja son lei oalle garas noiddiid doarrideamis ja oažžut sámiid gohccát (moridit) ja hilgut sin dološ ipmiliid. Go Trifon dál oaidná dan golbma noaiddi boahtime vácci vuona rastá, de son suhtai hirbmosit. Ja sus lei álo stuora ruossa, man guottašii. Son loktii dan su ruossa, čálii ruossa mearkka áibmui ja de cuoiggui dainna noiddiid guvlui ja rohkodalai Ipmilii.
Noaiddit ledje jur ollen gáddái, go dat dáhpáhuvai. Sii oidne movt báktái šattai ruossamearka ja ieža sii buohkat šadde geađgin ja sin sálaš - bierggut, čoarvvit ja duoljit - šattai muoldun. Go dát dáhpáhuvai ledje ollu olbmot čoahkkanan dohko. Ja sii buohkat oidne dán ipmaša. Ja guhkesáiggi olbmot ságastedje dan Trifon báhpa imašlaš vuoimmi birra.