PÅ NORSK:
(Muitaleaddji: John E. Utsi)
Eatnanvuolážat leat riggábut go olbmot mat leat eatnan alde: sis leat čáppa orohagat, hearvás fiinna biktasat ja ollu ruhta. Ja visot gollit ja silbbat mat gávdnojit eatnama vuolde, dat leat sin. Ja dasa lassin leat velá sin hálddus visot diet čiegát, máid olbmot áiggi mielde leat bidjan eatnamii, dakkár árahávddit. Ja dat leat biddjon eatnamii dakkár sániiguin ahte eai oaččo váldit iežát go lagas olbmot. Ja jus iežát váldet, de ráimmahallet.
Ja nu de báhcet ollu čiegát ulddaid háldui, go bárdni dahje nieida ii gávnna áhčis, iige áhkus čiegá. Ja ulddat eai atte daid čiegáid earáide go daidda rievttes maŋisbohttiide.
Visot, mii lea eatnama vuolde, ulddat hoidejit čábbát, ja seammá čábbát dat dikšot guovžža, mii nohkká dálvvi su biejus. Ulddat dat addet dasa borramuša, vaikko oaidnit gal ii sáhte ahte das lea biebmu čoavjjis.
Dát uldadáhpáhus lei 1800 loahpageažis. De lei nuorra olmmái dáppe Heahtás eret, mii lei vuolgán luopmániid čoaggit. Lei čakčageassi ja álggii arvit go lei doppe meahcis. Bárdni vulggii ruovttoguvlui vázzit ja rastildii jeakki, man ravddas leai unna buolžžaš.
De áicái suova ja dola dan buolžžas. Go son lei njuoskan ja veaháš galbmui, de son jurddašii manná son dohko biktáladdat, ja seammás oaidná mat olbmot doppe leat dolastallame.
Bárdni vázzá dohko ja fáhkkestaga rahpasa eanan ja bárdni fuobmá ahte dál son lea eatnama vuolde. Doppe leai hui stuorra dállu ja beavddi guoras čohkkájit amas olbmot, boares nisson, guokte luntta ja okta unna mánáš. Dat leat visot unnit ja oalle čábbat. Ja ii oktage sis orui leat oahpis sutnje. De rahpasii uksa dies siskelis ja bođii hui guhkes-vuovttat čáppa nieida bártni lusa ja fálai sutnje luopmániid borrat.
Dat ledje vilges lihtis, mas ledje golleravddat. Lihtti báittii nu girkkisin ahte bárdni measta (goasi) čalmmehuvvá. Bárdni gieldá ja lohka iežas čoaggán luopmániid lávkka dievva. Daid son áigu borrat go boahtá ruoktot. Son han muitá maid eadni ja áhčči láveba lohkat: Ahte jus šaddá háldiid lusa, dalle ii galgga fuollat borrat maidege, iige máistit ge.
Jus borat de šattai ulddaid luhtte álo orrut, it beasa goassege doppe eret. Loahpas šattat ieš velá uldan. Ja, lávii eadni dadjat: Ulddat liikojit hui bures nuorra sámi bártnážiidda ja sámi nieiddažiidda, mat sáhttet eallit sin luhtte ja addit sidjiide ulddamánáid. Das čohkkádettiin muitá bárdni go vuorrásat lávejit baldalit sin dain ulddain. Son jurddaša man láhkái doppe dál galggan beassat eret dain eatnanvuolážiin.
Son geahčada mii dan lanjas gávdno. Ja oaidná oalle imaš biergasiid. Viesus lei láhtti, mii gilddii ja seinniin ledje ráiggit, mas oaidná ja gullá meara, jur das olggobealde seainni. Bártni mielas dat orro oalle imaš. Son hal diđii ahte dáppe Heahtás, gos son orru, lea oalle guhkki merrii.
Beavddi alde son oaidná jorba diŋgga, dego stuora náhpi, mas gullojit jienat oalle čielgasit. Dego livččii olmmoš dan siste, mii ságasta. Bárdni jurddaša dat ferte leat oba unni diet olmmoš, mii dan sisa čáhká. Ja ballágoahtá go fuobmá ahte ulddat vedjet máhttit coggalit su nai dohko dan sisa.
Son oaidná dieid ulddaid váccašeamen ja fuobmá ahte sii hal láhttejit jur seammá láhkái go su olbmot su ruovttus dahket. Soames borra ja nubbi fas veallá ja vuoiŋŋasta.
De fállá diet uldanieida sutnje láibbi. Bárdni ii váldde dan ge vuostá. De boahtá ulddalunta su lusa. Dolle su oalgái ja láidesta uvssa guvlui.
Bárdni ii fuobmá movt dat dáhpáhuvai, muhto fáhkkestaga son lea fas olgun, dien jeakkis. Hoahpus son vuolgá eret doppe ja vázzá ruoktut, iige jorgalan gal geahččat maŋos guvlui, dien buolžža guvlui gal.
Go bođii ruoktut son muitalii dárkilit máid lei oaidnán ja vásihan, muhto fuobmái ahte ledje oasit dan fearánis maid son ii obanassii muitán ge. Dego sevdnjes oasit, dan su imaš mátkkis.
De golle jagit ja oalle guhkes áigi, ja bárdni rávásmuvai ja elii oalle guhká. Vuorasin, go olbmot álge atnit su boares muittohis diŋgan, son álggii muitit dien dološ fearána.
De, muhtun beaivvi, son fuopmái: Visot diet imaš biergasat, maid son lei oaidnán ulddaid luhtte dalle 60 jagi áigi, hal leat dakkárat mat olbmot odne geavahit. Ulddaid dálus ledje dalle jo leamaš dálá áiggi mášiinnat ja hutkosat. Radiot, TV, giehtatelefuvnnat, láibunmašiinnat, govvenrusttegat ja eará biergasat, máid olbmot dalle dolin eai oba diehtán ge gávdnot.