PÅ NORSK:
(Muitaleaddji: Kristina Utsi)
De lei dás Čávgosis ovtta siiddas bárdni. Áhčči ja eadni leigga eallime, ja ledje guokte oappážá vel. Ja sis lei buvri, gos nohkke (ođđe).
De go Bárdni manná seaŋgasis nohkkat ja de lea nohkihan veaháš áiggi, de gullá, dego olmmoš vuoigŋá su bálddas.
De go riepmá guldalit, de ii leat mihkkige olbmuid, ja juohke gearddi ihkku, go bárdni moriha, de gullá, dego vuoigŋá su bálddas.
Go son geahččá, ii oainne ovttage olbmo.
De dat riemai bárdni givssástuvvat. De manná ránnjásiidii, das lei boares áhkká.
De jearrá boares áhkás:
- Mii lea ráđđin dasa, go mon nohkan, de juohke ija lea riepman mu givssidit; de lea dego olmmoš go vuoigŋá. Muhto go mon čielggan nahkáriin, de mon in oainne maidege.
De jearrá boares áhkká:
- Leago dus buvreseinnis ráigi, ja nohkatgo don akto buvrris?
Bárdni dadjá:
- In mon nohka akto, mus leat guokte oappá, geat maid nohkkaba seamme buvrris.
- Leago dat nábárráigi du seaŋgga bakte?
Bárdni dadjá:
- Lea juolgeruša bakte.
- Lávetgo don dan gitta bidjat goassege?
Bárdni dadjá: - In.
De dadjá boares áhkká: - Mon attán ráđi. Galggat vuollat muorranávlli, vai sáhtát divttisin dan ráiggi dahkat ja váldit dan návlli iežat báldii. Ja go gulat vuoigŋamen iežat bálddas, čohkket ja bija návlli ráigái ja guldal (iska) seaŋgga.
Bárdni dagai dan ja de guldalii seaŋgga, ja de lei sus nissonolmmoš bálddas.
De njuikii dat nissonolmmoš eret seaŋggan, muhto ii beassan dan nábár-ráiggi čađa olggos. De válddi Bárdni gitta su ja bijai seaŋgasis.
Iđit šattai. De lei amas nieida bálddas. De doalvvui su sisa ja iige eadni dovdan. Bárdni gohččui borramuša ráhkadit, ja sii borre.
De jearrá bárdni: - Gos leat don boahtán?
Vástidii nieida: - Mon lean du ránnjanieida.
Bárdni dadjá: - In mon leat du oaidnán goassege.
De dadjá nieida: - Mon oainnán din juohkebeaivvi.
De dadjá: - Movt don sáhtát oaidnit min juohkebeaivvi, go mii eat oainne du juohkebeaivvi?
Nieida dadjá: - Čuožžil (vuolgge) mu mielde olggos!
Bártni ja eadni dagaiga dan, sii vázziledje ránnjásiidda vuostá (guvlui). Eaba fuopmánge, ovdal go leigga máđohis fiinna stobu siste. Doppe ledje juohkelágan biepmut ja gollelihtit ja silbalihtit beavdde nalde. De gohččohalaiga borrat.
De dadjá bártni eadni: - In mon bora!
De nieida gohččo bártni borrat.
Bárdni dadjá: - In mon dál sáhte din biepmuid borrat.
De eai šat fállan sudnuide borrat. Ja sii vulge fas dohko bártni siidii.
De orui dat nieida das biigán jagi, ja de dál bárdni riemai dasa irggástallat, ja de náitaleigga. Bođiiga báhpa lusa, ja bárdni sihtá su gulahusaid bidjat.
De bárdni dadjá nieidda nama; ja báhppa ozai girjjiin, namaid geahčai, muhto ii gávnna. Ozai máŋggain girjjiin, iige gávnna nama. De báhppa árvidii. Dat lea hálde-nieida.
De jearai bártnis: - Movt don leat dan nieidda ožžon min ollái? Dat ferte leahkit gufihttara nieida.
De báhppa bijai ieš nama ja čálii gulahusaid. Go galggaiga vihaide vuolgit, de moarsi jávkkai beaivvi ovdal veaháš áiggi, ja iige diehtán irgi, gosa lei mannan. Muhto dat bođii fargga ruoktot.
Eahket šattai; de dadjá nieida bárdnái:
"Buvreseaŋgga vuolde galggat mannat váldit dán giissá ja rahpat dan!"
Bárdni manai ja válddii giissá ja rabastii dan. De leai silba- ja golleruhta dievva giissá.
De dat válddii daid ruđaid, go vihaide vulggiiga, ja go leigga heajaid doallame, de ruhta ihttui headjabeavddi nala. De bártni áhčči liikui ja árvidii, ahte dat lea háldenieida dahje gufihtar, muhto ii jienádan maidege.
De šattai bárdni máđohis rikkis ja riemai gávpogiidda mannat ja juhkagoahtit, ja de šattai geafi, ja eamit gieldá:
"It don galgga juhkat."
De lei okta eahket; de sihtá dan boatnjis vuolgit iežas mielde. De soai vulggiiga.
Go leigga vázzime, de dadjá nieida:
"Go mon dál oažžon seamme giissá dievva golleruđaid, de don it galgga juhkat ja háddjet munno dávvira."
De dat lohpidii: ii son daga dan.
Golai áigi, de álggii seammaládje jugadit. De bođii gufihttara nieidda áhčči ja lei hui moaris.
De dadjá: "Mon lean dutnje vuohččan ruđaid addán nieidda mielde, ja dál mon lean nuppádis addán, ja jus dál háddjet daid, ii buorre šatta duinna."
Bárdni lohpidii: "In mon áiggo šat eanet juhkat gal."
Ja gárjji riemai oažžut, ja gárji šattai.