PÅ NORSK:
(Muitaleaddji: Nils Henrik Valkeapää)
Mun lean Nils Heaika Valkeapää. Mun lean dán jagi, in muitte man girjjis, lohkan muitalusa dološ sámiid birra. Sáhtalin vel dadjat: iežan máttuid birra doppe Suomanjárggas, dehe Geaggáneanu nalde.
1730-vuođđologus lea goit okta dakkar dáhpáhus. Dat lei Ovllá, dat lei Heikká-sogas. Báhppa lei dan geassán gearregiidda. Sivahii ahte juo, dat Ovllá lea uhkidan su borrat. Oainnát das lei duogážin dat ahte báhpa eamit lei vuovdán dan Ovllái viinni, ja dieđusge lei Ovllá gárihuvvan. Gárremiin lei, dan son gal mieđihii muitalit, ahte son lea leamaš gárremiin, ahte son ii sihkkarit muitte movt son lea dadjan ášši.
Muhto dat čilgii dasto ahte juo, dan son diehtá gal ahte maid son lea oaivvildan. Son lea oaivvildan ahte báhppa ferte sárdnidit nu bures, čábbát, viisát ahte sárdni borrá bures, ahte olbmot ipmirdit dan bures.
Na, ii han dies de boahtán dien dáhpáhusas mihkkege, muhto mu mielas dat lei earenoamaš suohtas muitalus, ja govve dan man čeahpit sámit leat leamaš don-dolin čilget áššiid. Oainnát dan áigge han báhpat vuvde viinni, ja diennalágiin dat ožžo dan iežaset ealáhusa. Ja leat muitalusat ahte dieid áiggiid, dehe veahá árabuš go báhpat boahtigohte deike Sápmái, ja duohko Suomanjárgii, de ovtta báhpas lei 600 littara buolliviidni fárus. Ja dan son dasto vuvddii sámiide, ja oahpahii sámiid juhkat.