PÅ NORSK:
(Muitaleaddji: Per Tor Turi)
Na, mus lea namma Per Tor Turi ja áiggošin buori ráđi addit dieidda, mat johtet Kárášjoga meattá luossabivddus: movt galgá vuosttaš háve go ii leat ovdal oggon, movt galgá hui jođánit luosa goddit.
Ja de ávžžuhan dan ládje ahte go leat vuodjime Kárášjogaleagi ahte de boahtá Iešjohkagáddái, gos leat smávit dabbalat de. Go de vuodjá diekko johkagáddái, diekko guovlá gos lea hui vuogas, jorba unna dappal, de sáhttá dan ládje álgit smiehttat ahte dál de boahtá ráđđái ávki dalle. Dalle galgá geahččat dakkár guhkes, njulges lánjáid ja de čuollat daid ja njáskat, ja diktit ovssiid orrut buot gitta, muhto ii galgga gal buot njáskat dego lávvomuoraid, dat galget gal dakkár oavssit vel.
Ja de go de manná dohko johkagáddái, de ferte váldit vel dan ládje ahte jus lea báidi dahje jáhkka badjelis, gaikkehit gitta čeabehii gitta, ja jus leat stevvelat, de ferte čatnat gitta. Ja de manat diehko johkagáddái ja fáipput dieinna buot maid nagodat diekko dabbal` bajábealde. Dat galgá dakko vulos mannát rávdnjái ja huškut diibmobeale dies!
Ja go dies de leat geargan, de manat dola dahkat dalle ja galggat bures váldit áiggi, oainnat de, dat mii de dies lea dáhpáhuvvan go fáipot, lea ahte leat čuoikkain duháhiid mielde doadján sojiid ja julggiid, mat leat gahččan johkii ja de čoahkkanit guolit issorasat. Go leat gáfe vuoššan, hmpf! De ii leat go bálkestit vuokka, luossa lea vajot gitta!