Janne & Mihkkal

Janne Eilen Mienna Guttorm (17) lea Guovdageainnus eret, Mikkel Rasmus Logje (16) ges lea Lahpoluobbalis eret, soai lávluba duos maid leaba gohčodan “Janne & Mihkkal”.

Lei oalle soaittáhagas ahte soai álggiiga fárrolaga lávlut, leigga álgán seamma gitáračuojahan kursii maid Ann Mari Andersen lágidii. Doppe árvalii Andersen sunnuide ahte lávluba fárrolaga doaluin mat ledje Guovdageainnus, go sutno jienát heivejit nu bures oktii, ja nu soai dagaiga. Dan jagi searvvaiga Sámi Grand Prixai, doppe soai bođiiga nubbin lávlagiin “Okto”, maid Andersen lea čállán.

Riddu Násttit gilvui searvaba ge golmmain lávlagiin maid sutno “mentor” Ann Mari Andersen lea čállán.

Gula: Go Mikkel R. Logje Janne&Mihkkal duos muitala ákkaid manne guldaleaddjit galget sin jienastit.

Soai searvaba Riddu násttit gilvui dan dihte go atniba dan stuora vejolašvuohtan ovdánit musihkalaččat ja dieđusge lea sutno mielas stuora dáhpáhus dat Riddu, ja doppe beassat lávlut han lea stuora gudni!

Mikkel Rasmus lei lávlon olu ovdal go oahpásnuvai Jannii, ja lea ge maid searvan Sámi Grand Prixai oktiibuot golmma geardde. Janne Eilen lávlugođii easka gitáračuojahan kurssas, go vácci vuosttáš jagi joatkkaskuvllas, nu ahte son lei oalle easkaálgi lávlu dalle go lávlugođii Mikkelin. Maŋŋá dan lea son searvan iešguđetgelágan báikkálaš doaluide, UKM’ai ja namuhuvvon Sámi Grand Prixái.

Dassážii soai eaba leat vel čállán ovttage lávlaga ovttas. Mikkel lea čállán olu lávlagiid ieš, ja Janne Eilen lea maid čálligoahtán lávlagiid. Boahtteáiggis áiggošeigga álmmuhit CD skearru mas sutno lávlagat, jus nu heive. Soai mieđiheaba ge ahte livčče somá šaddat veháš dovddusin muhtin beaivvi, ja doaivuba ahte Riddu Násttit sáhttá leat sutnuide buorre álgu!