Boazodoallit dovdet iežaset vealahuvvon

Čorgasnjárgga orohaga ovdaolmmoš, Magne Ballovara, lohká dán rihkkut boazodoallolága. – Su mielas lea imaš, ahte sii gártet máksit guođohanbarttain opmodatvearu gildii, váikko boazodoallolága mielde dain ii galgga dárbbašit máksit maidige.

GULDAL: Opmodatvearru boazodoalus

Boazodoalu ja eanandoalu gaskkas lea stuorra erohus divadiin. Ballovara lohkáge boazodoalu leat vealahuvvon eanandoalu ektui. Deanu gielda dáhttu goitge opmodatvearu buot orrun-, astoáigge- ja ealáhusvisttiin. – Boazodoallu lea ealáhus dego earáge ealáhusat ja danin dáhttot sii mávssu boazodoalliin. Nu lohká Øystein Somby-Solaas, Deanu gielddas. Opmodatvearrolága mielde eanandoallit eai goitge dárbbaš máksit opmodatvearu návehiin.

Norgga Boazosápmelaččaid Riikkasearvvi jođiheaddji, Nils Henrik Sara, lohká iežaset gieđahallat dán ášši NBR:a čuovvovaš stivrra čoahkkimis. – Boazodoalus ja eanandoalus eai galgga leat iešguđetlágan gáibádusat opmodatvearu ektui, muhto dát guokte ealáhusa galget leat ovttaveardásaččat.