Dán geasi riemut

Jus dus leš miella johtit reimuin nubbái dán geasi, na dalle gal ferte dus leat sihke valjis ruhta ja olu astoáigi.

Dán geasi oainnat lágiduvvojit olu ja máŋggalágán riemut. Sáhttá roahkka dadjat, ahte dát riemut bures govvejit dan kultuvrralaš valljivuođa mii lea dáppe davvin. Dás gávnnat oasáža dán jagi riemuin.

Feara makkár doalut

14 .- 22.06.: Nordkappfestivalen

Lágiduvvo Ávágis Davvenjárggas. Riemuin leat feara makkár smávit doalut, gilvvohallamat ja suohtastallamat.

22.06.: Lujávrri geasseriemut

Lágiduvvo Lujávrris, Guoládagas. Riemuin leat feara makkár guoimmuheamit, gilvvut ja suohtastallamat. Nissonolbmuid spábbačiekčamat jiekkis lea okta dáin.

03 .- 05.07.: Skiippagurrariemut

Lágiduvvo Skiippaguras Deanus. Skotlándalaš-irlándalaš The Waterboys lea váldogeasuheaddji. Muđuid gulat joavkkuid nugo Black Debbath, Bare Egil Band, Ragarockers, Adjágas ja Rolffa/Duolva Duottar.

10. - 13.07.: Gaskaijarocka

Lágiduvvo Leavnnjas Porsáŋggus. Ruottelaš joavku Europe lea váldogeasuheaddji. Muđuid guoimmuhit earret eará Kurt Nilsen, Cyaneed, KM Myrland ja Rolffa/Duolva Duottar.

09. - 13.07.: Riddu Riđđu

Lágiduvvo Olmmáivákkis Gáivuonas. Benin máilmmenásti Angelique Kidjo lea váldogeasuheaddji. Doppe leat maid eará eamiálbmot ártisttat ja sápmelaš násttit nugo Ingor Ántte Áilu Gaup ja Inga Juuso.

17. - 19.07.: Buktafestivalen

Lágiduvvo Tromssa gávpogis. Máŋga stuorra nama plakáhtas, earret eará Kent, Leningrad Cowboys ja Patti Smith.

23. - 27.07.: Márkomeannu

Lágiduvvo Evenáššis Davve-Nordlánddas. Earret eará Niko Valkeapää ja Sofia Jannok guoimmuheaba.

01. - 02.08.: Kárášjoga geasseriemut

Lágiduvvojit Kárášjogas. Prográmma ii leat vel gárvvis. Iige riemuin leat sierra neahttasiidu. Dál lea čielgan, ahte Intrigue ja Rolffa guoimmuhit.

06. - 10.08.: Várjjatriemut

Lágiduvvojit Čáhcesullos. Norgalaš máilmmenásti Sissel Kyrkjebø lea váldogeasuheaddji. Muđuid dollet jazzanásttit nugo Hiromi Uehara, Maria João ja Marilyn Mazur konseartta dáin riemuin. Transjoik ovttas Sher Miandad Khanain leat sápmelaš ovddasteaddjit.

15. - 16.08.: Aronnesrocken

Lágiduvvo Árenjárggas Álttás. Ida Marie lea váldogeasuheaddji. Muđuid čuojahit joavkkut nugo Cyaneed ja Alias Ellen.

22. - 23.08.: Heiafestivalen

Lágiduvvo Heias Gaska-Romssas. Dán jagi prográmma ii leat vel gárvvis.

28. - 30.08.: Kauto Live

Lágiduvvo Guovdageainnus. Dán jagi riemuid prográmma ii leat vel čielgan.

29. - 30.08.: Døgnvillfestivalen

Lágiduvvo Tromssa gávpogis. Riemut Davve-Norggas mas leat dat stuorámus ártistanamat, earret eará 50 Cent, Travis, Samantha Fox ja Limahl.

Sáhtát midjiide cavgilit jus váillahat makkárge riemuid dán listtas. Geavat dán čujuhusa: ardna@nrk.no

Fuomáš! NRK:s ii leat ovddasvástádus buot sisdollui siidduin mat leat ráhkaduvvon olggobeale NRK.