Sápmelaš girječálli Rauni Magga Lukkari lei mielde stuorra našonála teáhtergiehtačálusgilvvus maid Norsk Dramtikkfestival lágidii árabuš dán jagi. 80 giehtačállosa ledje mielde gilvvus ja Norgga Našonálateáhter liikui eanemusat sápmelaš girječálli muitalussii. Čakčamánu 29. beaivve čájehuvvoge "Lihkošalmmái" vuosttaš geardde.
Dehálaš fáddá
Našonálateáhtera dovddus neavttár Nils Ole Oftebro dat neavttaša monologas. Čájálmasas oahpásmuvvat eallilan albmái gii ássá smávva gilážis Deanuleagis. Son lea ássan váhnemiidis luhtte gitta dassáigo soai jámiiga. Su eatnerohkki leige gáskán (kastreren) su mánnán jo, vai dáhkidivččii ahte almmái ii manašii gosage ja divššošii váhnemiidis go soai boarásmuvvaba.
- Muitalus lea sihke buorre, miellagiddevaš ja suohtas. Čájálmasa fáddá lea maid dehálaš. Ovdal lea olu muitaluvvon das, ahte man láhkái nissonolmmoš gillá servodagas. Dán muitalusas beassat oaidnit, ahte almmáiolbmot han maid dulbmojuvvojit ja badjelgehččojuvvojit, čilge Nils Ole Oftebro.
Rauni Magga Lukkari "Lihkošalmmái" lea dat vuosttaš sámi teáhterbihtá mii goassige čájehuvvo Norgga Našonálateáhteris. Čakčamánu 27. beaivve diibmu 17.25 sáhtát Árdna TV prográmmas geahččat reportáša dán teáhterčájálmasa birra.
