Miessemánu 17. gitta 19. beaivái lágiduvvojedje "Norgga beaivvit" Murmánskkas Ruošša bealde. Dán jagi doaluin čájehedje dan viidodaga mii Finnmárkku kultureallimis lea. Kárášjoga rockjoavku Intrigue lei okta dain mii lihkostuvai buoremusat, čállá Ruošša neahttasiidu russland.ru.
Stuorra partydovdu
"Njunuš lágideaddjái Ulrich Kreuzenbeckii lei heavy-juoigan konsearta maid Kárášjoga joavku Intrigue doalai stuorámus dáhpáhus: Konseartabáiki Red Pub lei bahkka dievva, mii lea buorre bušehttii - muhto vel ain buoret: doppe lei mearihis buorre partydovdu. Musihkka lea vuogas bealljái ja lea dakkár masa eai dušše nuoramusat liikon", čállá Kreuzenbeck. Son lea maid neahttasiiddu váldodoaimmaheaddji.
Filkkagielda duhtavaš
Maiddái Finnmárkku filkkagieldda diehtojuohkinhoavda Wenche Pedersen lea duhtavaš Finnmárkkubeivviiguin. "Kulturoassi dán čalmmustahttimis lei issoras stuoris, hirbmat buorre ja bures lágiduvvon. Earret eará lei Intrigue-joavkkus albma menestuskonsearta", čállá Pedersen rápporttastis daidda filkkagielddas geat eai sáhttán leat Murmánskkas dáid beivviid.