Vil ha Hardangerbana på skinner igjen

– Det hadde vore heilt fantastisk, seier hotelldirektør Hans Edmund Utne, ved Hotel Ullensvang.

Siste godstog som rulla på Hardangerbana (sjå faktaboks) hadde turen sin for 25 år sidan. Fire år før det, var det slutt på persontrafikken. Sidan har jernbanelinjene mellom Voss og Granvin gradvis blitt omgjort til gang- og sykkelveg.

– Eg har alltid vore fascinert av den togskinna som eg ser når eg køyrer Voss og ned til fossen i Skjervet, og vidare ned til Granvin. For Hardanger ville det vore unikt å få opna bana igjen, meiner Utne.

– Treng meir fres vinteren

Saman med Destinasjon Voss, som er eit reisemåls- og utviklingsselskap, har hotellsjefen søkt om midlar til eit forprosjekt. Planen er å få vurdert kva det vil koste å gjenopne jernbanestrekninga.

Det er suksessen rundt Flåmsbana som gir inspirasjon til draumen. No håpar initiativtakarane på ei rask avklaring.

– Ja, så fort som mogleg. Vi treng fleire bein å stå på her inne. Spesielt i vintermånadene. Vi treng litt meir fres her i Hardanger på den tida. Flåmsbana gjer det godt heile året. Vi skal ikkje bli ein konkurrent til den, vi vil bli gode kollegaer, lovar Hans Edmund Utne.

• LES OGSÅ: Flåmsbana kåra til verdas beste togreise

– Lønsam på sikt

Hotelldirektøren får støtte frå reiselivskonsulent Trond Amland, som meiner gjenopning av Hardangerbana ville gitt Vestlandet ein ny stor attraksjon.

– Det er spenstige planar, og eg trur absolutt det er marknad for det. På sikt vil det absolutt vera ei lønsam investering for både reiselivsnæringa og for lokale bedrifter i Hardanger og Voss-området, meiner Amland.

Etter at all togtrafikk slutta å gå på skjenene mellom Hardangerfjorden og Voss, er store delar av strekninga nytta til gang og sykkelveg.

Ordførar Hans Erik Ringkjøb på Voss, meiner nettopp dette vil vera det største hinderet for prosjektet.

– Gang og sykkelvegen må truleg erstattast, og det vil nok føre til store kostnader. I tillegg til å få på plass bana, sjølvsagt, seier ordføraren.