Unik madonna kjem heim igjen

– Vi er veldig glad for å få ho tilbake, og gler oss veldig til ho er på plass igjen.

Det seier dagleg leiar Gøril Nordtvedt i Fortidsminneforeningen, avdeling Bergen og Hordaland, til NRK.no.

Det er Fortidsminneforeningen som eig Holdhus kyrkje i Fusa, der madonnaen høyrer heime.

– Vi er veldig glad i madonnaen. Ho er verkeleg nydeleg, seier Nordtvedt begeistra.

Unik i Noreg

– Madonnaen er den einaste i sitt slag i Noreg, og er eineståande i norsk kyrkjekunst, opplyser Riksantikvaren i ei pressemelding.

Skulpturen er av sandstein, og er ifølgje Riksantikvaren uvanleg godt bevart samanlikna med skulpturar på kontinentet.

Ekspertane meiner madonnaen er frå 1400-talet, og trur ikkje skulpturen kan ha vore laga her i landet.

Sjå video frå restaureringa:

Vanskeleg restaurering

Riksantikvaren har brukt 1,8 millionar kroner på arbeidet med å restaurera skulpturen.

– Konserveringsarbeidet har vore særleg utfordrande fordi vi har veldig lite erfaring med malte steinskulpturar i Noreg, seier Riksantikvaren i pressemeldinga.

• Les meir og sjå bilete av korleis restaureringa gjekk føre seg

I morgon ettermiddag er alle interesserte velkomne til å bli med når ein skal markera at madonnaen er tilbake.

• Meir om madonnaen på nettsidene til Fortidsminneforeningen