Turistar vil ha aktivitetar

Han er på mange måtar framtida sin turist, for saman med familien har han ikkje komme for å sjå staden Voss, men for å oppleve vindtunnelen til VossVind.

• Les òg: Ny vindtunnel på Voss

– Det blir ei oppleving for livet, seier Stig Lind Karlsen.

Stig er 12 år, og skal fly for første gong i vindtunnel.

– Det høyrest veldig kjekt ut, for eg har alltid hatt lyst å hoppe i fallskjerm seier, Stig.

Aukande interesse

Hjå Innovasjon Norge har dei sett at det er aktivitetar som sel, og som gjer at nokre stader opplever fleire turistar.

– Det er ei aukande interesse. Sjølv om det framleis kjem mange som ikkje vil delta på aktivitetane, så er det mange som kjem nettopp fordi det er eit tilbod om aktivitet der, seier Nina Broch Mathisen som er direktør i Innovasjon Norge i Hordaland.

Sjølv om alle ikkje er så aktive som Stig og familien, så trekk dei meir sedate turistane òg mot stader som tilbyr aktivitetar.

– Sjølv om du sjølv ikkje har tenkt å delta, så likar du å vere i dei litt hippe miljøa kvar det skjer ting, seier Mathisen.

Ti tusen årleg

Besøkstalet til opplevingssenteret VossVind har gått i taket i løpet av dei to åra det har eksistert.

• Les òg: Her flyr Jakob i en «orkan»

– Me ser ein betydeleg auke på førstegongsflygarar. Turistar og familiar kjem og ynskjer å oppleve ein aktivitet under ferien sin, seier Stian Overå som er dagleg leiar ved VossVind.

Då vindtunnelen vart opna, fanst det berre fem slike i heile Europa. No flyr ti tusen menneske her årleg. Og det kjem kanskje til å auke, for flyturen fall i alle fall i smak hjå Stig.

– Det var heilt vilt! Det kjennest som om eg er i anna verd, seier førstegongsflygaren.

– Kjem du til å gjere det igjen?

– Ja, truleg, seier han.

• Sjå saka her: