Færre innføringar av heroin og kokain til Noreg er blitt oppdaga av tollerar i år. Det viser tollvesenet sin statistikk for første halvår i 2012.
– Det er eit område som bekymrar oss. Me jobbar målretta med å finna ut årsaken til dette og med å bli betre, seier fungerande avdelingssjef Åge Skår i tollregion Vest-Noreg.
Det er ikkje berre tollregion Vest-Noreg som opplevder nedgang i mengden inndratt heroin og kokain, det same viser tala for heile landet.
– Vil framleis bli importert
Grunnen til at nedgangen bekymrar er at tollvesenet ikkje trur færre funn betyr at innføringa av slike stoff faktisk har gått ned.
– Me har ikkje sett nokon tydeleg indikasjon på at bruken og marknaden er i nedgang, og då vil det framleis bli importert, seier Skår.
Tollvesenet jobbar med å utvikla seg for å kunna stoppa meir. Dette skjer blant anna ved introduksjon av nye hjelpemiddel og målretta kontrollar der dei trur og håpar dei kan finna noko.
(Artikkelen held fram under videoen)
Bekymra over meir våpen
På andre område har tollvesenet på Vestlandet konfiskert meir i løpet av første halvår i år, samanlikna med i fjor.
Medan dei i fjor gjorde 7 beslag av slagvåpen i fjor, er dette meir enn dobla i år. 57 våpenprodukt er inndratt i dei 16 beslaga tollvesenet har gjort i år. Dette inkluderer både el ektrosjokkvåpen, teleskopbatongar, stikkvåpen, kastestjerner, slagvåpen og slåsshanskar.
– Dette ser me mykje av ved returar etter sydenreiser, og det bekymrar oss. Dette er våpen som går ut på gata om me ikkje stoppar det, seier Skår.
LES OGSÅ:
Meir av syntetisk narkotika
Tollvesenet er også bekymra over at dei har opplevd ein auke av narkotiske tablettar og syntetiske narkotiske stoff som kjem inn til landet i region Vest-Noreg. Det same gjeld dopingmiddel, der det både er gjort fleire beslag og større mengder blir funne i desse beslaga.
– Det kan vera ein indikasjon på auka bruk av doping, og at det finst miljø som nyttar seg av det, seier Skår.