– Flaumen var veldig bra for laksen

Flaumane på Vestlandet i fjor haust, som gjorde øydeleggingar for fleire hundre millionar kroner, hadde også positive verknadar.

– Undersøkingar som er gjort, viser at flaumen også har laga nye gyteplassar for den utryddingstrua Vosso-laksen, seier fiskeforskar ved Uni Research, Ulrich Pulg.

• SJÅ OGSÅ: Regjeringen berger vossolaksen

Nye gyteplassar

Første inntrykket tyder no på at det har oppstått nye gyteplassar i Bolstadelva. I den delen av Vosso-vassdraget der det i gamle dagar vart teke svære ruggar på over 30 kilo.

– På sikt så treng vi flaumar av og til for å vedlikehalde elvane og fiskehabitata i vassdraget, seier Ulrich Pulg.

– Det vil så klart vere veldig positivt for oss. No har jo elva slite i mange år, seier Knut Horvei er dagleg leiar i Bolstadelva grunneigarlag.

Var i ferd med å bli utrydda

Etter å ha hatt verdas kanskje største atlantiske laks fekk elva eit samanbrot på slutten av 1980-talet. Laksestamma vart i ferd med å bli utrydda av fleire ulike grunnar, i tillegg vart det eit høgt innslag med rømt oppdrettslaks i elva. Ein næringsveg vart borte.

– Elva har jo tidlegare våre ein av dei absolutt viktigaste næringa i bygda både for bøndene og grunneigarane. Den har betydd mykje og eg trur den vil bety mykje om den kjem opp og gå igjen, seier Horvei.

Ekstremværet til hjelp

Ein redningsaksjon vart så sett i gang for seks-sju år sidan. Ei storstilt tilbakeføring av rogn, smolt og yngel frå genbanken vart gjennomført. No ser deg også ut til at ekstremværet skal vera med å hjelpa å redda den unike laksestamma.

– Det finst fleire gyteplassar og skjul for ungfiskane, så dette var veldig bra. Også med tanke på Bolstadelva, der det tidlegare var få gyteplassar, seier Pulg.