Stor interesse for øl frå mikrobryggeri

– Det er ikkje mykje att. Det er strengt tatt ein god ting, seier Jens Eikeset.

Han er dagleg leiar i mikrobryggeriet 7 fjell bryggeri AS. Den første sorten deira er laga på utstyret til eit anna bryggeri. Men allereie før dei har eigne produksjonslokale står folk i kø for å kjøpa seg inn i selskapet.

Førre veke gjennomførte bryggeriet ei aksjeutviding. Den fekk dei enorm respons på.

– Vi skulle ut å hente rundt 5 millionar kroner, og fekk teikningar på i overkant av 9 millionar kroner. Interessa er overveldande seier Eikeset.

Saka held fram under biletet

Stor vekst

Gründerane i Bergen føyer seg inn i ein del av ølbransjen som opererer i liten skala, men er stor i vekst.

Siste tre åra har produksjonen til dei såkalla mikrobryggeria vakse med om lag 50 % per år. No finst det minst 45 av dei, og bryggeria står for 2,2 % av det totale volumet på ølmarknaden.

• LES OGSÅ: Skummende ølsuksess på mikronivå | – Dette vil øke interessen for spesialøl

– Det er veldig mykje. Det er små bryggeri, men veksten er heilt fantastisk og dette er ei bølge som har gått først frå USA og så til Europa. Det kom seint til Noreg men når det først kom så har det skjedd veldig fort, seier direktør Petter Nome i Bryggeri- og drikkevareforeningen.

Trur konkurransen blir tøff

Nome set øltrenden i samanheng med den store interessa for matkultur generelt. Men han trur konkurransen er i ferd med å bli tøffare.

– Eg trur ikkje det er liv laga for absolutt alle. Men det er forskjellige typar. Det er små pub-bryggeri og lokale gardsbryggeri. Det finst både smått og stort men dei som har ambisjonar om å vekse trur eg vil få det tøffare og tøffare.

• LES OGSÅ: Norsk pils taper mot utenlandske giganter

I Bergen trur dei marknaden vil halde fram med å vekse.

I det siste har det vore ein stor vekst. Toppen er ikkje nådd enno, definitivt ikkje, seier bryggemeister Gahr Smith-Gahrsen i 7 fjell bryggeri AS.