– Eg har aldri opplevd liknande

Passande nok, eller skal ein seie upassande nok, er tjuveria gjort frå fire navigasjonsanlegg i Tjuvasundet i Lindås kommune i Hordaland. Og det er ikkje ein lett operasjon å forsyna seg med solceller, lanterner og batteri frå dei fire anlegga i sundet.

– Her må dei først tjora seg godt fast før dei då klatrar opp på stativet, peikar og forklarar overingeniør Jan Erik Westergaard i Kystverket.

Det er Kystverket som jobbar og har ansvar for slike lanterner langs heile kysten i Norge. Westergaard har tatt med seg NRK for syna fram noko Kystverket aldri har sett før – at nokon stel delar av utstyret frå navigasjonsanlegga.

– Som å køyra utan brøytestikker

– Eg har jobba 27 år i Kystverket og eg har aldri opplevd dette før no. I tillegg har det skjedd to gonger på under ein månad, seier Westergaard og ristar på hovudet.

Dei frekke tjuvane har forsynt seg med seks solceller, to lanterner og ti batteri. Dagleg køyrer båtar i alle storleikar gjennom Tjuvasundet. Tjuveria fører derimot til at sundet no kan vera problematisk å ferdast i for større fartøy.

– Eg kan samanlikne dette med å køyre over ein fjellovergang om natta på vinteren, i storm. Så er det plutseleg nokon som tek vekk brøytestikkene, seier Westergaard.

Saka held fram under biletet

Vil gjerne ha tips

– Når vi ikkje har dette utstyret på plass, slik som vil skal ha, så kan det bli avgrensingar i dei seglingane som me vanlegvis gjennomfører her, seier losoldermann Kjell Asle Djupvåg i Kystverket.

• LES OGSÅ: Bruker sommeren til å pusse opp | Slik sikrer du deg mot båttyveri | Frekke tjuvar braut seg inn og stjal safe på Trollstigen

Dei har sin eigen teori på kva tjuvane skal bruka det litt uvanlege utbyttet til.

– Eg tippar dei vil ha dette på hytta eller noko. Men desse lanternene blinkar 120 gongar i minuttet. Kva skal dei med ei slik lanterne som blinkar så mykje?, spør Westergaard som gjerne tek i mot tips.

– Om du ser nokon som har ei lanterne i hagen som blinkar 120 gonger i minuttet, ring oss.