– ENDELEG! I dag skal det feirast!

– Endeleg! Det er det einaste ordet som passar i dag, seier Os-ordførar Terje Søviknes.

Frp-ordføraren meiner innbyggarane i Os no kan skimta slutten på den årelange kampen for å få på plass ny veg mellom Bergen og Os. I Nasjonal transportplan set Regjeringa av 3,4 milliardar til prosjektet.

– Det har vore 50 år med planlegging. Det har vore eit maratonløp med ei rekkje innlagde hinder undervegs, seier Søviknes.

Søviknes har lagt all politisk prestisje i prosjektet, og mellom anna gjort seg upopulær i eige parti for å gå inn for at prosjektet kan bompengefinansierast.

No skal vegen ferdigstillast innan 2018 eller 2019.

– Tydeleg signal

Vegen var eit av få prosjekt i Hordaland, som var inne på fagetatane sitt framlegg til Nasjonal transportplan. Sidan har prosjektet vorte dyrare. I dag kunne den daglege leiaren i Bergen-Os bompengeselskap sleppa jubelen laus. Vegen får 1,4 milliardar meir enn vegvesenet foreslo.

– Dette er det tryggaste me kan vera på dette tidspunktet. Dette er eit tydeleg signal om at Regjeringa vil bygga ny veg, det seier dagleg leiar Torbjørn Wilhelmsen.

Vegen som skal gå frå Svegatjønn i Os til Rådal i Bergen omfattar bygging av ein 16 kilometer lang veg, der om lag 13 kilometer skal gå i tunnel. I tillegg vert 3 kilometer av riksveg 580 gå i ny trasé, og fylkesvegen i Lysefjorden skal få opprusting.

Byggestart til vinteren

Prosjektet er for tida til ekstern kvalitetssikring (KS2). Det er venta at denne skal vera ferdig før sommaren. Målet er at byggestart kan skje i løpet av kommande vinter.

Prosjektet vil totalt kosta om lag 6 milliardar kroner. 3,4 milliardar står staten for, medan bilistane skal stå for 2,6 milliardar.

På dagens veg mellom Os og Bergen er køyretida om lag 35 minutt. Den nye vegen vil korte ned reisetida til 17 minutt.

– Folk smilar og knyter nevane i sigersrus!

Medan andre hordalandspolitikarar har seld inn ei heil rad med prosjekt til rikspolitikarane, har det berre handla om E39 for Søviknes.

Då partileiarane Erna Solberg, Audun Lysbakken, Knut Arild Hareide og ei rekkje politikarar frå regjeringspartia var samla i Bergen på nyåret, gjorde Os-ordføraren seg merka med ein presentasjon med ein bokstav og to tal:

E39!

– Dette betyr veldig mykje for mange. Folk smilar og knyter nevane i sigersrus. Men dette betyr særleg mykje for dei som pendlar på denne vegen, seier Søviknes.