Den døde kvalen
Fiskeridirektoratet bestemte at kvalen skulle slepast ut på ope hav, og redningsskøyta Kristian Gerhard Jebsen starta arbeidet laurdag føremiddag.
Vellykka slep
– Vi skal slepa kvalen fire-fem mil utover og sleppa han der. Så fer han med straumen. Det er det vi vanlegvis gjer med slike kvalar, sa skipper Ben David Leonhardsen på redningsskøyta til NRK.no i dag tidleg.
No er planane justert litt, og Kystvakta er kopla inn i saka.
– Vi ligg no i ro eit par nautiske mil ut frå staden der vi henta kvalen. Slepet har gått heilt som forventa og utan problem. No ligg vi her og held på kvalen til Kystvakta kjem i kveld og tar over, seier skipperen til NRK like før klokka 14.
Vil slepe kvalen til havs
Kystvakta legg ut frå Håkonsvern og vil vere ute ved kvalen kring klokka ti i kveld, seier skipssjef på KV Bergen, Lars Lilleng.
– Planen er å ta over kvalen og legge vestover ut i havet. Så vil me vurdere kor langt me må gå ut for at havstraumane skal ta tak i kvalen når me slepper han. Me har ikkje planar om å senke han, men få han ut av kysten og ut av hovudskipsleia slik at straumane tek han vidare, og fuglar og andre dyr får byrje å jobbe med kadaveret.
LIGG PÅ VENT: Dette bildet som er tatt like før klokka 14 viser at kvalen ligg i ro eit par nautiske mil utanfor Sandøy. Redningsskøyta ventar på at eit fartøy frå Kystvakta skal overta ansvaret for kvalen i kveld.
Foto: Ben David Leonhardsen/RedningsselskapetSåg noko rart i terrenget
Det var Øyvind Turøy som oppdaga kvalen.
– Eg såg noko rart i terrenget. Eg tok kikkerten, og såg det var noko som ikkje stemte. Då tok eg båten ut for å sjekka kva det var, fortalde Turøy til NRK.no i går.
Då han kom fram til staden, såg han at det var ein kval. Då køyrde han tilbake og henta sonen og ein nabo, slik at dei også skulle få sjå kvalen.
Ifølgje Øyvind Turøy er kvalen 10–15 meter lang.
FULL AV GASS: Kvalen var svært oppblåst då den blei oppdaga på Sandøy.
Foto: Øyvind H. Turøy / NTB scanpixOppblåst av gass
Det skal ha vore svært kraftig lukt av kvalen då han låg på Sandøy.
Kvalen var også full av gass, og det var fare for at den kunne eksplodera.
- Sjå den utrulege videoen:
Det er eit kjent fenomen blant fagfolk at gass kan føra til at kvalar eksploderer. Når kvalane blir liggande lenge etter at dei dør, oppstår det gass i innvollane og magen som følgje av at dyra rotnar.
– Det er ikkje alltid dei gjer det, men det kan henda, sa marinbiolog Tore Haug i Havforskingsinstituttet då NRK.no omtalte kvaleksplosjonen på Færøyane.
Vanlegvis skjer dette langt til havs, slik at ingen får med seg verken lukt eller eksplosjon.