Sju personar er sendt til sjukehus etter ein kollisjon på E16 ved Bolstadøyri mellom Dale og Voss.
Ein norskregistrert og ein russiskregistret personbil var involverte i ulukka som skjedde i 16-tida måndag ettermiddag.
– Sju personar skal vera skadde. Skadeomfanget er ukjent, men fleire skal vera kritisk skadde, opplyser operasjonsleiar Ronny Lentføhr i Hordaland politidistrikt.
E16 er stengt etter ei alvorleg trafikkulukke på E16. Både ambulanse, politi og brannvesen er på staden.
Foto: Geir Geitle/Avisa HordalandBåde politi, brannvesen, ambulanse og luftambulanse rykka ut til ulukkesstaden.
Tre til Haukeland og fire til Voss sjukehus
Tre personar er sendt til Haukeland Universitetssjukehus og fire personar er sendt til Voss sjukehus.
Seint måndag kveld opplyser Helse Bergen at ein 75 år gammal mann, ei 28 år gammal kvinne og ei 27 år gammal kvinne blei sendt til Haukeland universitetssjukehus. Alle tre er alvorleg skadde.
Tre av personane som blei sendt til Voss sjukehus er også alvorleg skadde. Dette er ei 70 år gammal kvinne, ein 37 år gammal mann og ein 26 år gammal mann. Ein 33 år gammal mann som blei sendt til Voss sjukehus er lettare skadd.
Ukjent ulukkesårsak
– Ein person skal ha blitt fastklemt, opplyser Rune Wigum, vaktkommandør ved Bergen brannvesen i 17-tida.
Politiet kan førebels ikkje seia noko om årsaka til ulukke.
– Det er oppretta sak og etterforskinga får visa kva det var som skjedde, seier operasjonsleiar Ronny Lentføhr.
E16 var ei stund stengt ved Bolstad. Kl. 18.30 opplyser politiet bilane er fjerna frå vegen og trafikken går no som normalt igjen forbi ulukkesstaden.