Politiadvokat Thor Buberg bekreftar lauslatinga av den sikta til NRK måndag ettermiddag.
– Om vi eventuelt skal anke avgjerda tek vi stilling til seinare, seier Buberg.
Den 40 år gamle mannen har vore i politiets varetekt sidan dødsvalden på Stord i desember. Torbjørn Bauge (50) døydde av skadane han vart påført i sin eigen heim.
Sleppt fri
Då forlenga fengsling skulle opp i Haugaland tingrett i dag, bad politiet om ytterlegare fire veker fengsling med brev- og besøkskontroll for den sikta 40-åringen. Dei meiner det framleis er fare for at bevis skal gå tapt.
Retten var ikkje samd i dette, og erklæra mannen lauslatt. 40-åringen er framleis sikta for lekamsskading med døden til følgje. Sikta har erkjent dei faktiske forhold, men hevdar han handla i sjølvforsvar.
Ventar på svar frå Kripos
Det går føre seg framleis etterforsking av kva som skjedde i avdøde sin bustad på Sagvåg natt til sundag 7. desember. Politiet fekk bistand av Kripos til tekniske undersøkingar i huset.
– Vi ventar på resultata av dei. Samstundes held vi framleis på med avhøyr i saka, avsluttar politiadvokat Thor Buberg til NRK.