På 1064 hjul blei bustad- og utstyrsmodulen til Edvard Grieg-plattforma i helga flytta frå land på Kværner Stord og ut på ein lekter.
Den store operasjonen tok totalt ni og ein halv time. Arbeidet med å setja den 8000 tonn tunge plattformdelen ut på sjøen byrja laurdag. Søndag vart operasjonen fullført og modulen kom seg trygt ut på lekteren.
- Sjå det tunge løftet i videovindauget øvst i saka
Har jobba med plattforma i tre år
Frå før av har verftet allereie gjort unna ein enno tyngre flytting. Sjølve plattformdekket på Edvard Grieg-plattforma vart flytta ut på lekter førre helg, ein modul som har ei totalvekt på 16.000 tonn. Den tredje biten i puslespelet, prosessmodulen, blir bygd i Egersund hjå Aker Solutions.
Kværner Stord har jobba med bygginga av plattforma i tre år. Kommunikasjonsansvarleg Odd Naustdal seier dei er i god rute til å nå målet om overlevering 15. april.
– Vi er stolte over arbeidet vi har gjort og veldig nøgde med at vi klarar å levere til den datoen som er avtalt med vår kunde. Ei fjør i hatten for norsk leverandørindustri, seier Naustdal til NRK.
Blir sett saman i Nordsjøen
Verftet på Stord har bygd plattforma på oppdrag frå selskapet Lundin. Det står att noko arbeid før Kværner overleverer modulane til Lundin.
– Lundin fraktar modulane ut til feltet i Nordsjøen. Der står allereie stålunderstellet klart, slik at ein kan montera dei tre delane saman der ute, forklarar Naustdal.
Tøffe tider
Ferdigstillinga av plattforma er eit lyspunkt i ein elles tung periode for Kværner Stord. Verftet har tapt fleire kontraktar til Asia, medan Aibel i Stavanger tidlegare i vinter sikra seg gigantkontrakten på det planlagde Johan Sverdrup-feltet på Utsira-høgda.
Dette kan gå hardt utover Kværner, som truleg må kutta mellom 250 og 500 tilsette i løpet av året.
– Vi har ikkje noko val. Topside-produksjonen er ein stor del av aktiviteten vår på Stord og i Oslo. Slike kontraktar er det lite av framover, sa administrerande direktør Steinar Røgenes til avisa Sunnhordland tidlegare i mars.
– Det er ein ekstremt tøff situasjon no, men vi jobbar for å gjera oss meir konkurransedyktige. Vi har alle ambisjonar om å by på plattformer også i framtida, avsluttar Naustdal til NRK.