– Vi har oppfordra departementet at dei i større grad legg opp til ein prosess der omsynet til det enkelte barnet sitt beste skal vera avgjerande for det tiltaket som vert sett i verk, seier juridisk rådgjevar i UNICEF Norge, Ivar Stokkereit.
I går fortalde NRK om June Elise Gulli, som vart oppfordra til å byte skule då ho fortalde om mobbinga ho vart utsett for. No vil regjeringa endre lova for å gjere det klart at det er mobbaren som må flytte til ein anna skule.
Lovverket opnar allereie for at ein kan flytte mobbarar til andre skular. Men regjeringa foreslår no å presisere i opplæringslova og privatskulelova at det er mobbarane som må byte skule i slike saker.
– Me gjer no lovverket tydelegare, slik at det kjem klart fram at det er mobbaren som skal byte skule og ikkje den som blir mobba, seier Kunnskapsminister Torbjørn Røe Isaksen (H).
- SJÅ OGSÅ:
Det beste for barnet
Dette reagerer UNICEF Norge på.
– I barnekonvensjonen står det at ein må vurdera det enkelte barn sitt beste i alle saker som angår barn. Det er viktig at ein gjer det og i desse sakene, seier Stokkereit.
UNICEF Norge meiner at det ikkje er kva som gjort, men kva som er til beste for barna som må vera grunnlaget for bytte av skule.
– Ein må vurdera omsynet både til dei som blir mobba, men og til mobbaren. Ein må gjera ei avveging i dei ulike omsyna. Det må ikkje bli automatikk i at det alltid er omsynet til den som mobbar som må vika. Det viktige er at det vert gjort ei reel vurdering av desse omsyna, seier den juridiske rådgjevaren.