Hopp til innhold

Politiet utvidar siktinga etter knivdrapet i Fyllingsdalen

Den 50 år gamle mannen er sikta for drapet på ei 35 år gammal kvinne i Fyllingsdalen i desember i fjor.

Kvinne knivdrept i Fyllingsdalen

SKJERPAR SIKTINGA: Politiet arresterte den 50 år gamle mannen i desember i fjor. Han er sikta for å ha knivstukke og drepe ei 35 år gammal kvinne.

Foto: Marit Hommedal / NTB scanpix

Politiet har utvida siktinga til drap under særdeles skjerpande omstende, skriv Bergens Tidende.

– Skjerpinga har samanheng med den endelege obduksjonsrapporten. Den slår fast at offeret blei påført mange potensielt dødelege knivstikk, seier politiadvokat Trond Eide til avisa.

LES OGSÅ: Forsvararen: – Drapssikta følte seg provosert

Ber om sakkunnig vurdering

Det var i desember i 2014 at den 50 år gamle mannen blei sikta for å ha knivstukke og drepe ei 35 år gammal kvinne i Fyllingsdalen i Bergen. Mannen blei pågripen på staden og har i avhøyr erkjent å ha stukke kvinna med kniv.

Politiet har bedt om at mannen vert observert av sakkunnige. Årsaka er at den 50 år gamle danske statsborgaren tidlegare er dømt for fleire sedelegheitsforbrytelsar i Danmark.

Ifølgje politiadvokat Trond Eide dreier det seg om seksuelle krenkingar mot to kvinnelege pasientar, medan mannen jobba som heimepleiarassistent.

Forsvarer Kaj Wigum ønskjer ikkje å kommentere 50-åringens tidlegare dommar.

Ventar på svar etter kriminaltekniske undersøkingar

Etterforskinga av drapssaka nærmar seg no ei avslutning.

Politiet ventar på svar på krimtekniske undersøkingar, samt ei eventuell vurdering frå sakkunnige på om mannen er tilrekneleg.

LES OGSÅ: – Kvinna kontakta politiet om den drapssikta