Mannen som vart funnen død i Hardangerfjorden ved Ålvik er ein mann i slutten av sekstiåra og som er busett i området.
– Vi fekk melding frå AMK om at ein person var observert i sjøen ved båthamna i Ålvik. Personen vart funnen i vatnet med ryggen opp, seier operasjonsleiar i Hordaland politidistrikt Morten Kronen.
Politiet fekk melding om observasjonen frå AMK klokka 16:40. Ein forbipasserande hadde kasta seg i sjøen og fått tak i vedkommande. Det vart starta med livreddande førstehjelp med ein gong.
– Personen vart erklært død på staden av ambulansepersonell klokka 17:07, seier Kronen.
Politiet har funne båten til den avdøde. Den låg med motoren i oppvippa stilling og det vart funnen tau-restar i propellen.
– Det ser ut som at han kan ha prøvd å fjerna tauet i propellen, så vi ser på dette som ei ulykke, seier Kronen.
Eit vitne såg også mannen i båten sin før ulykka.