Ho og sambuaren flytta til området i september, og merkar skilnaden godt.
– Det er mange færre bilar og mykje meir behageleg å gå her.
Ein annan som gler seg er Svein Nikolai Grimstad. Han har budd i Bjørndalskogen ved Bjørgeveien i 40 år.
– Før pleidde vi å halde oss unna hovudvegen når det var mykje trafikk. Det er heilt fantastisk at den no er vekke. No er det søndag kvar dag her, seier Grimstad.
Over 13.000 færre bilar
Byggetrinn 2 av Knappetunnelen på Ringveg vest stod klart til opning 12. november. Snart tre veker seinare er dei første trafikktala klare, og dei syner at tunnelen gjer jobben.
Ferske tal frå Statens vegvesen viser at det i snitt var så mange bilar som nytta Bjørgeveien frå måndag til fredag:
- Veka før opning: 23.892 bilar.
- Veka etter opning: 10.441 i døgnet.
Det er ein nedgang på 13.451 bilar i døgnet, eller 56 prosent, etter at den nye tunnelen opna.
Nytt køyremønster
– Det er ein kraftig nedgang, og sikkert veldig gledeleg for dei som bur i nærleiken av Bjørgeveien, kommenterer prosjektleiar Sverre Ottesen i Statens vegvesen.
Han er ikkje overraska over trafikktala i det heile tatt.
– I Bjørgeveien visste vi at det kom til å gå kraftig ned. Det vi har vore usikre på, er den såkalla overføringseffekten. Altså kor mange som no vel å køyra Knappetunnelen når dei skal til og frå Kokstad og Sandsli.
Førebels ser det ut som byggetrinn 2 av Knappetunnelen har gjort at folk har fått nytt køyremønster.
Trafikktala etter dei to første vekene syner nemleg at kring 10.000 fleire køyretøy enn det som var vanleg i Bjørgeveien før, no køyrer gjennom nye Knappetunnelen.
– Dei bilane må jo komma frå ein plass. Skal eg tippa, trur eg det er bilar som tidlegare har køyrt Fjøsangerveien eller Løvstakktunnelen, meiner Ottesen.
Får gode tilbakemeldingar
Han presiserer at statistikken er førebels, og at det vil ta i alle fall ein månad før nye køyremønster har sett seg hjå folk.
– Er den nye Knappetunnelen ein suksess?
– Det er alltid farleg å seia det, når ein har bygd tunnelen sjølv. Men vi har fått gode tilbakemeldingar frå folk om at dette er ein veg som fungerer, seier Ottesen.
Knappetunnelen er til saman 7,2 kilometer lang. Sluttsummen for heile den ferdige ringvegen er på 2,9 milliardar kroner for begge byggetrinn.