«Summit!!! Klarte det!! Jeg staar paa toppen av Mt. Everest».
Denne meldinga frå Mats Steinsland (35) tikka inn til sambuaren Elisabeth Kock i natt. Steinsland skal vera den første bergensaren som står på toppen av verdas høgste fjell, Mount Everest.
Ein time seinare klarte også ekspedisjonskameraten Håkon Åsvang frå Florø å nå toppen. Tommy Steinsland, fetteren til Mats, skal gå mot toppen om nokre dagar i ei anna gruppe.
Det var Bergens Tidende som først omtalte det vellukka toppforsøket til Steinsland og Åsvang.
Gladmelding frå toppen av Mount Everest i natt.
Foto: Skjermdump– Ein stor draum
– Det har vore ei nervepirrande natt, seier sambuar Elisabeth Kock til NRK.
Ho har følgt Mats heilt til topps via ein tracker, som han kan sende korte meldingar på. No følgjer ho spent med på nedstigninga frå verdas høgste fjell, frå heimen deira i Bergen.
– Han har kvilt nokre timar på camp 4, men er på veg nedover no. Truleg saman med Håkon.
– Dette er ein stor draum som har gått i oppfylling for Mats, legg sambuaren til.
Før skjema
NRK skreiv om dei tre friskusane tidlegare i vinter, då dei la planar for å stige opp på fjellet som ruvar 8 848 meter over havet.
Då rekna dei med at toppforsøket ville bli mellom 20. og 23. mai, grunna statistisk gunstige vêrforhold, men no har to av tre altså klart å nå toppen før skjema.
– Vi skal gjera eit verdig toppforsøk og har tru på at vi skal klare det om vi unngår ulukker og sjukdom, sa Tommy Steinsland til NRK i januar.
MANASLU 2012: Tommy og Mats Steinsland på veg mot toppen der dei vart stogga av eit snøskred.
Foto: PrivatMøtes på vegen
I skrivande stund er Mats på 7800 meter over havet, på veg ned mot basecamp som ligg på 5000 meter.
Tommy vil prøve å nå toppen 19. mai, og dei to fetterane vil difor møta kvarandre på veg opp og ned frå verdas høgste fjell.
– Han har fått gode vêrmeldingar, og vi er spente på Tommy sin tur opp og ned frå Everest, seier Kock.
Opplevde dødsskred
Tommy og Mats har vore på ekspedisjonar i Himalaya før, og opplevd kor farleg dei høge fjella faktisk er.
- I 2012 vart teltleiren deira delvis gravlagt i eit stort snøskred på 6400 meters høgd på Manaslu i Nepal. Elleve klatrarar omkom
- I 2014 skulle Tommy prøva seg på Mount Everest, men vart hindra av eit snøskred som tok livet til 16 sherpaer. Hans ekspedisjon vart ikkje direkte råka av skredet.
Karane forsikrar om at dei set tryggleiken først når dei er ute på ekspedisjon. Dei sette kursen mot Himalaya i mars, og er venta tilbake i Bergen i juni.
