– Eg forstod vel allereie då eg var 19 år at eg hadde eit usunt forhold til alkohol, seier Mikael frå Bergen.
Han drakk kvar dag gjennom heile 20-åra. Til og med på kino hadde han med seg øl.
– Eg kunne ikkje gå å bowle med nokon utan å drikke. Om eg gjekk på kino hadde eg med meg åtte halvliterar som eg drakk på 40 minutt. Då var filmen uinteressant, seier Mikael.
Mot slutten av 20-åra innsåg Mikal at han trengde hjelp. Anonyme Alkoholikarar (AA) vart redninga.
- LES OGSÅ:
Fleire unge tek kontakt
Fleire unge med alkoholproblem tar kontakt med Anonyme Alkoholikarar, og det er spesielt eit aukande tal blant unge i 20-åra.
– Nær 15 prosent at dei som går til AA er under 30 år. Interessa er aukande, seier «Arne» som har lang fartstid i AA.
Han har god oversikt over medlemsmassen rundt om i hele landet. Og trenden er tydeleg.
– Eg merker det på at dei kjem, og på måten dei deltar på. Dei kjem fordi dei søker eit nytt livsgrunnlag.
Uroa over trenden
– Norsk ungdom drikk generelt mindre enn før. Men dei som drikk, drikk meir, seier forskar og lege ved legevakta i Oslo, Odd Martin Vallersnes.
Vallersnes er uroa over den nye trenden.
– Vi ser fleire med akutt alkoholforgifting og mange drikk risikabelt ofte, seier Vallersnes.
– No orkar eg ikkje meir
For Mikael kom vendepunktet etter over ti år med ekstrem alkoholbruk.
– Eg tenkte berre at no orkar eg ikkje meir og at no måtte eg gi meg. Eg fann nummeret til AA og ringde, seier Mikael.
– Eg har det bra i dag. Eg har nesten ikkje angst, og eg ei bra helse og fysikk. Det kan eg takka AA for i dag, legg Mikael til.