Nektar straffskuld for overfallsvoldtekt

Ein polititenestemann i Bergen skal ha kjent att mannen på overvåkingsbilete og ut frå vitneskildringa. Han blei så etterlyst internt i politiet over heile landet.

Den rumenske mannen i 30-åra blei pågripen i Oslo natt til søndag og sikta for overfallsvoldtekten på Nygårdshøyden natt til 16. juli i år.

Mannen blei i dag varetektsfengsla i fire veker.

– Fengslingsgrunnlaget er unndragelsesfare, altså at me fryktar vedkommande skal rømme, seier politiadvokat Asbjørn Onarheim.

Framstilt for varetektsfengsling i dag

Den sikta tok betenkningstid på varetektsfengslinga. Han vedkjenner ikkje straffskuld, seier mannens forsvarar Amir Hossein Mirmotahari.

– Eg har hatt ein samtale med han i dag om saka. Han erkjenner ikkje straffskuld for det han er sikta for.

– Av det eg har fått opplyst er det ingen tekniske bevis som knyter han til saka. Det er fornærma sin forklaring ut frå klesplagga til denne gjerningspersonen, som gjer at politiet mistenker at det kan vere den sikta. Men det er for tidleg i sake til å stadfeste eller avkrefte om ein har rett person, seier Mirmotahari.