Carte Blanche må til utlandet for å øva til eige jubileum

I Carte Blanche sine øvingslokale på Nøstet i Bergen sentrum, er nye trinn under innstudering. Noregs nasjonale kompani for samtidsdans skal feire 25-års jubileum med ei stor framsyning på Operaen si hovudscene i Oslo i januar.

Men for å øvd på koreografien i rett storleik, må dei utanlands for å finne eigna scene.

– Vi skal reise til Frankrike, der kan vi gjere ferdig framsyninga. Så det er løysinga vi måtte finne, fortel teatersjef Bruno Heynderickx.

Prekær scenemangel

I Frankrike får dei låne ei stor scene i bytte mot å framføra urpremieren på framsyninga der. Det vart løysinga denne gongen, på det som er ein prekær scenemangel i heimbyen Bergen, der dei hels skulle vore.

– Det ideelle hadde sjølvsagt vore å gjort ferdig heile produksjonen her, og så hatt premieren her i Bergen også, fortel Heynderickx.

Høyr radiosaka:

Det som skulle vere ei førebels løysing, har no vara i fem år. Sidan scena dei brukte hjå Teatergarasjen vart rive i 2008, har dei brukt eit gammalt TV-studio som scene i Bergen.

Set rammer på det kunstneriske

– Bak her har vi ingen plass for dansarane å passere, seier teatersjefen og syner sceneforholda det nasjonale kompaniet må klara seg med.

Her må dansarane snike seg langs veggen for å entre scena, og scenografien er nøydd til å vera heilt enkel. Rammene for det kunstneriske arbeidet er svært tronge og kompaniet får ikkje utvikle seg slik det burde, meiner Heynderickx.

– Det finst grenser viss ein vil gjere større produksjonar. Ein kan drøyme mindre, og det set rammer for kva vi kan gjere og kva vi ikkje kan gjere.

Saka held fram under biletet

Sprengt kapasitet

Scena har også økonomiske konsekvensar. For salen har berre plass til 150 publikummarar. Noko som er altfor lite, ifølge direktør Tone Tjemsland.

– Eg trur me har eit større potensial enn det me har moglegheit for å utnytta. Eg ser at me er meir eller mindre utseld, alltid. Publikumsutviklinga vår og det å finna nye publikumsgrupper er ikkje noko poeng i, me har ikkje plass til dei. Det er fullt, seier Tjemsland.

– Bergen kommune er klar over at dette er ein vanskeleg situasjon, svarar byrådsleiar Ragnhild Stolt-Nielsen.

Har ingen plan B

Kommunen satsar alt på at ein ny teatergarasje på ei kommunalt tomt i sentrum, også skal huse Carte Blanche. Men både private huseigarar og fylkeskonservatoren har hatt store innvendingar mot det planlagde nybygget.

Det er difor uvisst om det lar seg realisere. Og kommunen har ikkje nokon plan B.

– Når me skal sikre nye scener for kompanier, så snakkar vi ofte om nybygg, regulering og tomteland. Så det er ikkje gitt at det å hive seg over ein plan B vil realisere prosjektet fortare. Vi held fast på plan A og at det skal la seg realisere, seier Stolt-Nielsen.

– Vi må ha arbeidsforhold

I si tid var det kontroversielt å plassere Noregs nasjonale kompani for samtidsdans i Bergen. Kulturdepartementet er hovudeigar av kompaniet, og har ingen planar om å flytte det. Men dei føl nøye med på scenesituasjonen.

– Det er ein situasjon som opptar oss. Det er eit strålande kompani som har status både nasjonalt og rykte internasjonalt, så det er viktig at dei har gode arbeidsforhold og eigna lokale, seier statssekretær Knut Olav Åmås.

-Hadde det vore betre å vore i ein anna by?

– Eg trur Bergen er den beste byen for Carte Blanche, men det er klart at vi må ha arbeidsforhold her, om det framleis skal vera den beste byen for oss, seier direktør Tone Tjemsland.

Løysing tidlegast i 2016

– Vi pleier å komme fram til gode løysingar gjennom ein konstruktiv dialog, og det trur eg vi også får til her, seier Stolt-Nielsen.

Carte Blanche vil tidlegast få ny scene i 2016.

– Eg meiner vi treng ei scene i Bergen samsvarar til omdømet og ambisjonane til kompaniet, avsluttar teatersjef Bruno Heynderickx.