Lei av unødige leiteaksjonar

Seinast i går kveld blei det sendt opp naudbluss i eit hytteområd ved Seljestad i Hardanger.

To aksjonar på kort tid

Politiet rykte ut til staden, men fann ingenting som tyda på at nokon var i naud. Hovudredningssentralen blei og varsla, men aksjonen blei avslutta seinare på kvelden, ifølgje loggen frå politiet.

Det er berre to veker sidan dette skjedde i same område, og no er politiet i Hardanger lei av slike hendingar.

– Vi reknar med at dei gjer det berre for moro skuld. Men utanom nyttårsafta må vi ta dette alvorleg, seier politioverbetjent Per Helge Sekse ved Hardanger lensmannskontor.

Problem i nyare hyttefelt

Han seier dette er eit kjent fenomen også frå andre politidistrikt, og at det ofte er knytta til nyare hyttefelt. Men han understrekar at det er ulovleg å senda opp rakettar utanom på nyttårsafta, viss ein ikkje er i naud.

Les og: Måtte rykka ut på falsk alarm | Nødraketter ved Karlsøya | – Påskefyrverkeri kan koste liv | Tar ikke nødraketter alvorlig | – Trolig falsk alarm

– Dette fører til heilt unødig ressursbruk for politiet og andre leitemannskap som kanskje skulle vore brukt på andre ting. I verste fall kan det føra til at slike naudsignal ikkje blir tatt like alvorleg neste gang, seier han.

Sekse seier folk kan bli straffa med fleire tusen kroner i bøter viss dei blir tatt for å ha sendt opp naudrakettar og naudbluss utan at nokon er i fare.