Bussen fekk store materielle skadar i bussen, men ingen av dei som var inni kom fysisk til skade.
Foto: Kjetil FjellbyEin buss og ein personbil var involvert i ei møteulukke ved Sør-Kvingo i Masfjorden kl. 07.17 tysdag morgon.
– Møteulukka skjedde i ein sving ved Sør-Kvingo. Føraren av bilen var ei kvinne som var aleine i bilen. Ho er sendt til Haukeland universitetssjukehus i luftambulanse. Etter det me kjenner til skal ho ikkje vera kritisk skadd, seier operasjonsleiar Jan Steimler i Hordaland politidistrikt.
Sjokkskadar hos busspassasjerane
Ifølgje AMK skal kvinna vera vaken og oppegåande, og tilstanden skal vera stabil.
Busspassasjerane skal ikkje vera fysisk skadde, men fleire skal ha fått sjokkskadar.
– Det kan opplevast som skremmande å vera involvert i ei slik ulukke og dei som treng det får hjelp av helsepersonell på staden, seier Steimler.
Det var til saman sju personar på bussen. Bussen er ein kombinert rute- og skulebuss, som var på veg frå Andvik til Knarvik. Fleire av passasjerane i bussen er elevar ved Knarvik vidaregåande skule, opplyser politiet.
Ein kjent ulukkesstad
– Etter å ha snakka med helsepersonell på staden reiste dei fleste av busspassasjerane vidare mot Knarvik, seier Ivar Holmaas, lensmann i Masfjorden.
Politiet kan førebels ikkje seia noko om årsaka til møteulukka, men opplyser at det fleire gongar tidlegare har skjedd trafikkulukker på denne staden.
– Det er ikkje mogleg med passasje i denne svingen, forklarer Holmaas.