Mange av tunnelane her i landet, og spesielt på Vestlandet, tilfredsstiller ikkje tryggleikskrava i nye direktiv frå EU.
No er 245 millionar kroner til tunnelsikring kutta frå statsbudsjettet i budsjettavtalen mellom KrF, Venstre og regjeringa.
Det betyr at ein kuttar til tunneltryggleik, til utbygging og vedlikehald av dei mange tunnelane me har i landet, seier stortingsrepresentant for Senterpartiet, Janne Skjelmo Nordås (Sp).
– Då får ein ikkje oppgradert tunnelane i det tempoet som er nødvendig for å gjere dei sikrare, meiner ho.
LES OGSÅ:
– Den førre regjeringa har skulda
200 riksvegtunnelar på over 500 meters lengde har manglar. Innan utgangen av april 2019 må tunnelane som ikkje held mål, vere fiksa.
– Det er rett at veksten i budsjettet blei redusert med 245 millionar kroner, frå ein milliard til om lag 800 millionar, i budsjettforliket med Venstre og KrF, seier Helge Orten (H) i transportkomiteen på Stortinget.
Men det er den førre regjeringa som har ansvaret for dei elendige tunnelane på Vestlandet, meiner han.
Trass i kuttet på nesten ein kvart milliard, meiner Orten dei no aukar satsing på tryggingstiltak i tunnelar, og at vedlikehaldsetterslepet på riksvegane blir mindre.
71 omkomme i tunnelar dei siste ti åra
Frå 2003 til 2013 omkom 71 menneske i norske tunnelar. Orten seier regjeringa satsar mykje på å ruste opp riksvegane.
– For oss er det viktig å seie at i 2015 vil me satse på vedlikehald av riksvegane, som gjer at me for fyrste gong på fleire tiår faktisk reduserer vedlikehaldsetterslepet.
Senterpartiet meiner likevel det burde vore satsa meir på å sikra tunnelar på Europavegane.
– Vestlandet har mange tunnelar som treng oppgradering, både for å ivareta vedlikehaldet som er, men også for å gjere dei sikre nok til å tole den auka transporten me ser mellom dei ulike regionane, seier Skjelmo Nordås.
LES OGSÅ: