– Det er ganske alvorleg om ein flygar er rusa og skal frakte mange hundre menneske høgt oppe i lufta. Det kan få uante konsekvensar, seier politioverbetjent Trond Østen Berge på Bergen lufthamn Flesland.
I dag vert pilotar og anna flypersonell berre alkotesta ved mistanke. I fjor vart luftfartslova endra og politiet fekk lov til å gjera uanmeldte kontrollar av pilotar.
Men tilfeldige kontrollar vert ikkje prioritert av politiet.
– Har ikkje ressursar
Sjølve seier politiet at dei ikkje har ressursar til å gjennomføre rutinemessige kontrollar av pilotar og anna luftpersonell.
– Vår ressurssituasjon og våre oppgåver på ein flyplass er så mange at vi ikkje kan prioritere det og vi har heller ikkje sett av mannskap til å gjera slike kontrollar.
–Det er alvorleg for flysikkerheita, sjølvsagt, vedgår Østen Berge.
Politiet på Gardermoen fortel også at dei ikkje gjennomfører tilfeldige ruskontrollar. Dei ynskjer ikkje å svare på vidare spørsmål rundt dette
– Kan føla seg trygge
Luftfartstilsynet seier dei ikkje har pålagd politiet å prioritere promillekontrollar.
– Vi ser ikkje at det er noko problem i dag. Derfor er det ikkje gjort, seier senior kommunikasjonsrådgjevar Marit Kvarum i Luftfartstilsynet.
Ho seier passasjerar i dag i høgste grad kan føla seg trygge.
– Det er slik at om det er mistanke om alkohol så vert politiet varsla. Det at politiet har fått moglegheita til å gjera uanmeldte kontrollar, er jo eit verkemiddel dersom dette skulle bli eit problem.
– Og blir det eit problem, vil vi ta kontakt med politiet for å få dei til å endre rutinane sine, forsikrar Kvarum.
– Politiet si oppgåve
Statssekretær Geir Pollestad (Sp) i Samferdsledepartementet, krev heller ikkje at politiet skal ta tilfeldige kontrollar i lufttransporten.
– Det er vurderinga som politiet sjølv må gjera. Vi har gitt dei regelverket, så er det politiet si oppgåve å handheva det, seier Pollestad og siktar til lovendringa i fjor.
– Men i sum er norsk luftfart trygt. Dei som jobbar om bord i luftfartøy er edru, og politiet har verkty for å kontrollera at det faktisk er tilfelle.
Men at ikkje pilotar vert promillekontrollert utan at det er mistanke, reagerer flypassasjerane på.
– Dei burde jo gjera det, eg ser ikkje noko grunn til at det skal vera annleis for pilotar enn i biltrafikken, seier ei kvinne til NRK, medan ei anna meiner det er alvorleg.
– Eg tykkjer ikkje det er greitt, ein har jo ansvaret for mange verdiar og mange menneske. Det er ganske alvorleg.
Vil tydeleggjera
Politidirektoratet seier det lokale politiet sjølv må bestemme om dei vil gjera tilfeldige kontrollar eller ei.
– Politimeistrane i dei ulike politidistrikta må vurdera og prioritera utifrå kapasitet og utifrå kor stort dei reknar problemet til å vera. Det er ikkje gitt detaljerte sentrale føringane for dette, seier avdelingsdirektør Christian Budsberg Pettersen i Politidirektoratet.
Han seier dei kjem til å gjera det tydeleg for politidistrikta at dei har moglegheita til gjennomføra uanmeldte kontrollar.
– Det har vist seg at det er litt ulik oppfatning av korleis ein skal forstå regelverket. Det vi kjem til å gjere er å gjera det klart for politiet at dei, som følge av lovendringa i fjor, kan gjennomføra promillekontrollar. Anten på førespurnad frå luftfartsmyndigheiter eller på eige initiativ, avsluttar Budsberg Pettersen.