Denne veka syr deltakarane i Symesterskapet ein A-linjeforma kjole, med mjukt fall og god vidde nedst. Har du lyst til å gjere det same, er det ingen grunn til å la vere. Snittet er enkelt, og kjolen passar til alle.
Utfordringa her er å lage ei fin halsutringing ved å sy på ei form for kanting som heiter belegg. Det hjelper me deg med her:
Belegget er eit stykke stoff som klippast i same fasong som ytterkanten på delen av plagget du vil kante (her halsutringinga). Belegget har ei breidde på ca. 4–7 cm tilpassa plagget sin fasong.
Du kan også bruke denne teknikken til å sy forkant og nederkant på ei jakke eller som eit alternativ til skjørtelinning.
Slik får du fin kant på utringinga:
1. Klipp hovudstoff, belegg og vliselin (til belegget).
2. Stryk vliselin på belegget si vrangside.
3. Fest belegget med knappenåler langs halsutringinga. Legg belegget si rettside mot rettsida på hovudstoffet.
4. Sy saman belegg og hovudstoff. Bruk 1 cm saumrom (1 cm mellom saumen og kanten av stoffet).
5. Klipp hakk inn mot saumen. Dette gjer du for at stoffet skal ligge fint i utringinga når du legger belegget mot plagget si innside. Dette er spesielt viktig i alle bua saumar.
6. Klipp deretter av halvparten av saumrommet, slik at det er att ca. 0,5 cm av saumrommet. (Du kan også reinklippe saumrom før du klipper hakk. På tjukke stoff reinklipper ein saumrommet i forskjellige breidder slik at det ikkje blir så tjukt og synast på rettsida).
7. Vreng belegget mot vranga og damp.
8. Og der har du ei fin halsutringing med belegg på baksida. Denne metoden kan brukast når ein syr andre typar belegg også.