Har funne mannen som var sakna etter brann i Sveio

Laurdag ettermiddag blei det meldt om brann i eit bustadhus i Sveio. Tre personar budde i huset, og då politiet berre fekk kontakt med to av dei frykta dei at tredjemann kunne vera inne i huset .

– Tredjemann kom til rette i natt. Han hadde vore på besøk då huset tok til å brenna i går, seier operasjonsleiar Norunn Byrknes i Haugaland og Sunnhordland politidistrikt.

Dermed er alle bebuarane i huset komne til rette.

Bustadhuset fekk store materielle skadar i brannen og brannvesenet frykta laurdag at det kunne rasa saman.

Brannårsaka er førebels ukjent.

– Vanlege undersøkingar vil bli gjort på brannåstaden i morgon, opplyser Byrknes.