Det er ein travel føremiddag for politi, brann og helse i Hordaland. Glatte sidevegar rundt omkring i distrikta har gitt fleire trafikkuhell:
- På riksveg 49 i Kvam hamna ein bil på taket ved Fonnaland
- Ved Gaupås i Bergen køyrde ein bilist rett i ein stolpe
- I Masfjorden hamna ein bil med to personar i fjellveggen i Austrefjordvegen
- Og på fylkesveg 48 ved Tombre køyrde ein bil inn i ein parkert bil.
- Klokka 13.00 køyrde ein bil inn i ein anna bil bakfrå i Hjellestadvegen i Bergen sør.
– Det er glatt føre og det gir ein del trøbbel. Heldigvis er det ingen store hendingar og dei involverte har ikkje fått alvorlege skadar, seier operasjonsleiar Frode Kolltveit i Vest politidistrikt.
Kvinne og to barn til legevakt
På fylkesveg 48 var det i ein periode stengt mellom Mundheim og Eikelandsosen etter trafikkuhellet der ein bil kolliderte med ein parkert bil.
Her er ei kvinne og to barn sendt med ambulanse til legevakta i Bergen. Dei skal ha fått lettare skadar, ifølge politiet.
I Kvam vart ein 19 år gammal mann sendt til lokal legevakt, etter å hamna på taket ved Fonnaland. Dei to som kolliderte med fjellveggen i Masfjorden har sleppt unna med skrekken.
– Folk må vera obs på at det er svært glatt, spesielt på sidevegane. Vi har ingen meldingar frå riksveg 555 i Bergen, eller frå E39 eller E16. Men rundt omkring i distrikta er det trøblete føre. Ta det med ro, oppfordrar Kolltveit.