– Vi kan takke det lokale næringslivet for dette. Dei har sponsa oss med sårt trengde midlar, og vi kan byrja å køyre snø frå Vikafjellet til løypene i Voss Ski- og tursenter, jublar prosjektleiar Tore Nyborg.
Om knappe to veker går noregsmeisterskapen i skiskyting av stabelen i skisenteret på Voss. Der kjem Tora Berger og Ann Kristin Aafedt Flatland for å gå sitt siste NM, samt tidenes olympiar Ole Einar Bjørndalen.
Kritisk snømengd
Og ein kan godt forstå at Nyborg er i godt humør torsdag. For få dagar sidan var det krisestemning på Voss. Med berre to veker att til skiskyttar-NM var mengda med snø i skiløypene kritisk låg.
– I verste fall må me køyra inn snø frå Vikafjellet, til ein kostnad på 300.000 kroner. Men dette er pengar me ikkje har, sa prosjektleiaren måndag.
Nyborg hadde brukt søndagen til å sitje i krisemøte med arrangørane. Eit vêromslag med vind, regn og 10 varmegrader hadde i løpet av helga skapt slaps og overvatn i NM-løypene.
Artikkelen held fram under biletet
Sponsar 300.000 til snø
Torsdag ser ting mykje lysare ut.
– Vi måtte gå ein runde til næringslivet på Voss. Dei tek rekninga for transport av snø, sjølv om dei ikkje har ein direkte gevinst av arrangementet, fortel Nyborg.
Det er Voss Energi, Vekselbanken og Voss Sparebank som finansierer NM-arrangøren med snø. Måndag byrjar fem kontainarbiler å køyra snø frå Vikafjellet til skiløypene på Voss, heile dagen utan stogg.
– I tillegg har meteorologane lova oss temperaturar som gjer at vi kan setje i gang snøproduksjonsanlegget natt til søndag. Det er utruleg herleg at vi no kan garantere ein skikkeleg skiskyttar-fest i slutten av mars, avsluttar Nyborg til NRK.