Fryktar ulukker i Måbødalen

Lastebileigarforbundet i Hordaland får dagleg uromeldingar frå sjåførar som fortel at mange utanlandske vogntog har for høg fart på strekninga ned Måbødalen på riksveg 7.

– Eg får fleire urovekkjande meldingar. Dei går på at sidan vegen om Lærdal er stengt, så er det veldig mange utanlandske vogntog som no køyrer Hardangervidda, og på veg ned Måbødalen har dei alt for stor fart, seier fylkesleiar Jan Ove Halsøy i Lastebileierforbundet i Hordaland.

Fryktar front mot front

Mange av sjåførane som har ringt inn har vore yrkessjåfør i fleire år.

– Dei er redde for å møta eit vogntog slik at det blir front mot front inne i ein av tunnelane. Dei er også redde for at dei kan treffa ein buss på veg ned. Sjølv om det er mange år sidan bussulukka i Måbødalen har mange den friskt i minnet likevel, fortel Halsøy.

• LES OGSÅ: Politimann: – Jeg husker ulykken som om den skjedde i går

I august 1988 køyrde ein turistbuss med svenske skuleborn og vaksne i fjellveggen i ein tunnel i Måbødalen. Bremsene hadde svikta på veg ned den bratte dalen. 12 born og fire vaksne mista livet i ulukka.

– Vi vil vera føre-var

– Det er to ting som er farlege her. Det eine er at farten blir for stor slik at dei ikkje klarer svingane i tunnelen eller utanfor tunnelane. Det andre er at bremsene kan gå varme, med dei katastrofale følgjene det kan få nedover der, forklarar Halsøy.

– Kvifor er det dei utanlandske sjåførane de spesielt er bekymra for?

– Dei norske kjenner stort sett typografien og dei som køyrer der har køyrt opp og ned Måbødalen før. Dette er ikkje for at me skal prøva å kritisera utlendingane, dette er for å vera føre-var, og prøva å ta tak i dette før me får ei alvorleg ulukka. Det er tragisk viss det skjer noko, det kan få enorme konsekvensar, svarar han.

Stengd ein månad

I går kom Statens vegvesen med meldinga om at oppryddinga etter tunnelbrannen i Gudvangatunnelen tek lenger tid enn venta.

I verste fall kan tunnelen bli stengd i ein månad.

Leiaren i Lastebileierforbundet i Hordaland meiner Statens vegvesen og politiet har eit ansvar medan trafikken gjennom Måbødalen er større enn den er til vanleg.

– Her bør gjerne Statens vegvesen eller politiet rykka ut og følgja med på trafikken. Dei bør overvaka og gripa tak i problemet viss dei ser at trafikken utviklar seg. Det er snakk om å prøva å forhindra ulukker, og eg oppmodar dei til å ta tak i dette og sørgja for at me ikkje får ei ulukke no ned Måbødalen.

Vurderer å auke kontrollane

Til NRK.no seier Statens vegvesenet at dei er klar over den auka trafikkmengda på riksveg 7.

– Vi held eit ekstra auge på omkøyringsvegane, seier Rune Skår i Vegvesenet. Han forklarar at omkøyringsvegane over Vikafjellet og Hardangervidda har andre stigningsforhold og vegbreidde enn stamvegen E16.

– Det er andre vegar enn mange av sjåførane er vand med å køyra på. Vi vurderer å auka talet på kontrollar av vogntog, stadfestar han.

Kontrollane går ut på å sjekka til dømes vekta til vogntoga samt temperatur på bremsene.

Vegvesenet kan ikkje svara på når dei eventuelt vil setje inn ekstra kontrollar på omkøyringsvegane.