Folkemøte om ubåtlagnad på Fedje

Onsdag inviterte fiskeri- og kystminister Lisbeth Berg-Hansen til to folkemøte om lagnaden til ubåten utanfor Fedje.

Det vert mest sannsynleg aller siste moglegheit til å påverke kva som skal skje med det 67 år gamle ubåtvraket.

• LES MEIR: Ministeren vil møte folket på Fedje

Høg temperatur

I januar kom ein ny rapport, laga på oppdrag frå departementet, med tilråding om å dekke til U864. Men lokalbefolkninga er ikkje einige med ekspertane.

• LES MEIR: Anbefaler tildekking av miljøbomba
• LES MEIR: Frykter jordskjelv kan føre til kvikksølv-lekkasje utenfor Fedje

– Siste sjanse

– Dette er vårt siste desperate forsøk på å få ministeren til å snu, men vi prøver så lenge det er ein sjanse, seier Lisbeth Stueland, leiar i Aksjonsgruppa Hev U864.

For både lokalpolitikarar og aksjonistar på Fedje vil heve ubåten i frykt for forureining og ei naturkatastrofe om dei 67 tonna med kvikksølv som er om bord i vraket.

Ser ikkje vitsen

Aksjonistar, lokalpolitikarar og folk flest var til stades, men ikkje alle såg vitsen med eit nytt møte.

– Eg er usikker på kvifor det trengst eit møte no, det viktigaste for oss er at det snart kjem ei avklaring, seier ordførar i Fedje kommune, Kristin Handeland.

Ho meiner dei allereie har fortalt alt dei meiner til ministeren.

– Berg-Hansen har jo høyrt alle argumenta våre før, så vi veit eigentleg ikkje heilt kva ho skal her, seier Handeland.

Open for spørsmål

Berg-Hansen på si side, hadde eit mål for møtet:

– Eg meiner det er naudsynt å presentere den nye rapporten for alle, og høyre om dei har nokre nye spørsmål.

Trur du det kjem fram noko dei ikkje har høyrt før?

– Nei, det veit eg ikkje.

For dei som vil ha vraket heva, ser kampen ut til å nerme seg tapt, og for dei er det viktigaste å få ei avklaring så raskt som mogleg.

– Eg og vil ha saka avgjort så fort som mogleg, men eg kan ikkje sei meir om når det blir, seier Berg-Hansen.