I to døgn har flaumen herja med Vestlandet. Vatnet har røska med seg hus, rive bort bruer og vegar og fleire hundre er evakuerte. Nokre av dei har mista heimen sin, andre veit ikkje når dei får flytte heim eller om dei får flytte heim.
I dag har redningshelikopter henta ut folk som har vore utan vegsamband, isolerte på grunn av vatnet.
Onsdag kveld er vassnivået i ferd med å søkke. Men skadane flaumen har ført med seg kjem til å merkast og vere synlege for folk i lang tid.
LES OGSÅ:
Fem hus tatt av elva
I Hordaland har særskilt Odda og Voss fått kjenne på kva skader ein flaum kan føre med seg. I Odda har vatnet greve ut store deler av sentrum, og på Voss har flaumvatnet brote seg inn i kjellarar, knust bruer og vegar.
- Opoelva i Odda har dratt med seg fem hus, og vatnet har grave seg under fem til, som heller ikkje kan bergast og truleg må rivast.
- I Odda er 75 personar og 39 bygningar evakuerte, blant dei bustadhus og industribygg.
- 15 hus i Hjøllo er utan vegsamband og isolerte. Bebuarane vert evakuerte i kveld med helikopter.
- E16 mellom Voss og Bergen har vore stengt, saman med over 30 andre vegar på Vestlandet. Framleis er fleire vegar i Hordaland stengde. Bergensbanen er også stengt.
- Voss ungdomsskule er stengt på grunn av flaum.
- Bebuarar på Odda sjukehus blei evakuert etter at vassmassar kom under ein oksygentank.
- Kjellarane til fleire butikkar, industribygg og offentlege bygg har vore oversumt av vatn. Mellom anna har fabrikken Nortura Evanger blitt stengt.
- Fleire hundre har vore utan straum i Hordaland.
(Artikkelen held fram under bileta)
Fleire hundre evakuerte
Mange hundre personar er evakuerte frå heimane sine i Sogn og Fjordane sidan flaumen tok til å herje tysdag.
- Totalt 160 personar er evakuerte etter flaumen i Aurland. 143 av dei vart evakuerte i går kveld og natt, i områda frå Høgabru til og med Flåm sentrum.
- 17 personar blei i dag henta ut i helikopter frå Ruo og Indrelid i Flåmsdalen.
- Minst ti personar har vore isolerte av flaumen ved Håreina i Aurland. Dei er evakuerte og får tidlegast flytte heim i morgon.
- I Stryn var to bygder isolerte og vassforsyninga til innbyggjarane og sjukeheimen i Innvik har vorte kutta.
- I Lærdal har 31 personar blitt evakuerte. 23 av dei har fått flytte heim. 41 personar har vore utan vegsamband under flaumen.
- Eit tjuetals fylkesvegar var lenge stengde på grunn av ras, rasfare og flaum.
- I Årdal var 15 husstandar og 25 personar evakuerte. Alle har fått komme heim.
(Artikkelen held fram under videoen)
NVE: – Vassføringa er på retur
Måndag varsla NVE flaum og rasfaren i Hordaland på høgaste nivå (nivå 4/raudt). I Sogn og Fjordane blei det varsla til nivået under (nivå tre/oransje). No er vassføringa på retur, og varslingsnivået på heile Vestlandet er på nivå to (gul).
SJÅ: Følg med på vêret på Yr.no sin vêrradar
Ifølgje NVE er det likevel stor vassføring i enkelte vassdrag.
I Vosso nedanfor Vangsvatnet er det venta at vassføringa vil vere nede i eit nivå under middelflaum (gjennomsnittet av den største vassføringa kvart år) i løpet av morgondagen.
I Gaularvassdraget nedanfor Viksvatn kan det ta 3–4 dagar. I vassdraga rundt Aurlandsfjorden og Sørfjorden er det venta at dette skjer i løpet av dagen.