I dagens fengslingsmøte valde den drapssikta å gi ein kort forklaring. Han gav uttrykk for at han meiner politiet ikkje har gjort jobben sin og at han må ta konsekvensane.
– No må politiet avslutte dette sirkuset og la meg få snakke med min familie. Ein treng ikkje vera professor for å forstå at dette kan knekka ein person og få han til å tilstå, sa den 32 år gamle mannen i Bergen tingrett ifølge Bergens Tidende.
Fengsla i fire veker
Mannen er sikta for innbrot og drap på åtte år gamle Monika Sviglinskaja i november 2011. 32-åringen har allereie vore fengsla i åtte veker, og politiet bad i dag om å halde han varetektsfengsla i fire veker til.
I Bergen tingrett fekk dei medhald. 32-åringen er varetektsfengsla i fire veker med brev og besøksforbod.
Ny rekonstruksjon
Saka om dødsfallet til Monika vart først lagt bort, men etter å ha gjenopna etterforskinga vart 32-åringen arrestert og sikta for drap i oktober i år. Politiet har DNA-treff som knyter litauaren til åstaden på Steinsland på Sotra.
For ei veke sidan gjennomførte Kripos ein rekonstruksjon på åstaden, der også Monikas mor var til stades. Samstundes med fengslingsmøtet i Bergen, gjorde Kripos i dag ein ny rekonstruksjon.
Denne gongen med fokus på det tekniske. Ovanfor BT bekreftar etterforskingsleiar Tor Kallmyr i Kripos at ein slik rekonstruksjon ikkje vart gjennomført under den opphavlege etterforskinga.