Brann slo Strømmen 2–0 i sin første heimekamp i 1. divisjon og står med fire poeng etter dei to første serierundane.
Alejandro Castro brukte berre 26 minutt før han scora i sin første kamp i Brann-trøye. Dermed spelte han ei viktig rolle i Brann sin 2-0-seier mot Strømmen.
Costaricanaren tok imot eit innlegg i boksen, og frå fem meter sette han ballen sikkert bak Thomas i Strømmen-buret.
Brann med meir sjølvtillit
I det 78. minutt kom den viktige 2-0-scoringa. Då dukka Huseklepp opp. Han fekk ein nydeleg gjennombrotspasning frå Kristoffer Larsen, og åleine med keeper sette han ballen i mål.
– No føler eg meg veldig bra, dette er ein god start på sesongen. Så no må vi byggje vidare på dette, seier Erik Huseklepp.
I fjor brukte spissen 18 kampar før han skåra sitt første av totalt tre seriemål. No har Huseklepp to mål på to kampar.
– Korleis har du førebudd deg til sesongen?
– Eg har trent masse og fått meir sjølvtillit. Det gjer underverk, seier Huseklepp.
– Viktig kamp for oss
Brann-trenar Rikard Norling vedgjekk at Brann ikkje imponerte, men greidde det viktigaste i stadionpremiera.
– Vi måtte vinne denne kampen for sjølvtilliten vår. Vi briljerte ikkje, men gjorde jobben. Dette kan vi vekse vidare på, seier Brann-trenar Rikard Norling.
– Kor nøgd er du med prestasjonen dykkas i dag?
– Den er langt ifrå god nok, men vi må samle mange poeng og det er det viktigaste no, seier Norling.
– Hadde garantert tapt i fjor
– Desse kampane hadde vi garantert tapt i fjor, seier Jonas Grønner.
Etter kampen meiner Grønner at det var eit Brann-lag som klarte å vinne 2–0 på ein dårleg dag.
– Vi må venne oss til å vinne uansett korleis forma er. Sjølv om vi ikkje er opp mot vårt beste i dag – men likevel vinne kampen, så skal vi vere nøgd i dag, seier Grønner.
Kampen enda til slutt 2–0 i raudtrøyene sitt favør, og alle poenga vart igjen i Bergen.
Dårleg besøkstal
I kveld serieopna Brann mot Strømmen på heimebane, men ikkje alle hadde tatt turen til stadion for å sjå brann spele i 1. divisjon.
– Vi hadde håpa at vi hadde seld 10.000 billettar til opningskampen, men i staden ligg vi på 8500, seier Algerøy.
I fjor møtte 11.991 personar på første brannkamp, i år har Brann budsjettert med 8000–8500 selde billettar på årets første kamp.
– Vi er ikkje nøgd. Så no må vi prøve oss litt fram, seier billettsjef i Brann, Dag Frode Algerøy.