Det var klokka 20.49 tysdag kveld at politiet fekk melding om trafikkulukka på E39 i Lindås kommune. Ulukka skal ha skjedd i eit kryss like ved Eknes karosseri.
– Det var éin bil involvert i ulukka. Føraren av bilen var bevisstlaus då me fekk meldinga, men er no bevisst og blei tatt hand om av ambulansepersonell på staden, seier Morten Kronen i Hordaland politidistrikt.
Lettare skadd
– Mannen sat fastklemt inne i bilen, men folk på staden fekk han ut. Han blir no sendt med luftambulanse til Haukeland sjukehus.
Tilstanden til føraren av bilen var uviss då han vart frakta bort frå staden.
Onsdag føremiddag opplyser sjukehuset at det var ein 25 år gamal mann som vart frakta til sjukehus, og at han vart lettare skadd i ulukka.
Mistenkjer at førar var rusa
Ifølgje politiet er det mistankar om at mannen har køyrt i rusa tilstand.
Vegen var stengt i ei kort periode, men klokka 21.30 melder politiet at vegen er open for fri ferdsel.