Bergensbanen er opna

Bergensbanen opna klokka 22.45, melder Jernbaneverket.

Politiet fekk melding like før klokka 13.30 tysdag at eit 40 meter breitt jordras hadde gått i Vaksdal. Det store raset sperra både Bergensbanen og E16.

Sjølv om toga no går, må ein rekne med ein del forseinkingar.

• LES OGSÅ: Sjå helikopterbileta av raset
• LES OGSÅ: Tog køyrte inn i stort jordras ved E16

Buss og båt for tog

Fram til Bergensbanen opnar, køyrer NSB buss på strekninga Arna–Garnes og båt mellom Garnes og Stanghelle for lokaltoga.

Før i dag undersøkte geologar rasstaden og sette i gong med oppryddingsarbeidet under rasoverbygget.

Europaveg 16 opnar ikkje

– Det er ikkje rett at rasfaren er over. Det er framleis rasfare på vegen på den same strekninga, seier geolog Julie Bjølien som har vore på staden og gjort undersøkingar.

Sidan det framleis er rasfare vil ikkje Europaveg 16 opne i dag. Det vil bli gjort nye vurderingar i morgon.

– Jernbanen har rasoverbygg på denne strekninga, difor er det trygt for dei å rydde, forklarer ho.

Omkøyring er ved Romarheim eller for tunge køyretøy er det fylkesveg 7 over Kvamskogen, via Granvin.

Lange køar

Martin Hauso står og dirigerer trafikken i Granvin.

– Vi kom ikkje på plass her før kl. 17.00 og då var det heilt kork, men no går det greitt, seier Hauso.

Rundt kvart 20. min slepp bilane forbi ved Granvin og Kvanndal.

– Det er lang kø før kvar gong vi slepp forbi, seier Hauso.

Så lenge E16 er stengd blir trafikken på Rv 7 dirigert både ved Kvandal- Granvin og Øystese- Lepso.

• LES MEIR OM RASET HER