Hundrevis i aksjon på E16 for trygg veg

Innbyggjarar langs hovudvegen mellom Oslo og Bergen er leie av å vente på ny veg. Denne helga arrangerer innbyggjarar mellom Voss og Bergen ein «gå-sakte-aksjon» for å presse samferdsleministeren til å ta ei avgjersle om kvar den nye traseen skal gå.

– Slik eg har forstått det har samferdsleministeren allereie for over halvanna år sidan lovt å kom med eit svar. For å få det inn i Nasjonal Transportplan er det viktig at denne avgjersla kjem før jul, seier aksjonsleiar Himle.

• LES OGSÅ: Berre småpengar til E16: – Må bety at vi får ny veg

E16 til og frå Bergen har blitt kalla «dødsvegen», på grunn av høg førekomst av både alvorlege ulukker og mange rasfarlege plassar.

– E16 er russisk rulett

Dersom dei ikkje lukkast fryktar Himle at dei vil måtte vente årevis før noko blir gjort med vegen.

– Målet er å få byggestart i 2018. Vi håpar aksjonen kan få merksemda til ministeren, seier Himle.

Fem ulike alternativ for ny E16 har vore diskutert, som varierte i pris frå 2,8 milliardar til 55 milliardar kroner. Det mest populære «K5-alternativet» legg opp til å kutte reisetida med bil Bergen-Voss frå 72 til 46 minutt, med mellom anna åtte nye tunnelar for bil og tog.

• LES OGSÅ: – Han viser ingen handlekraft

Himle er klar på at dei ser på K5 som den klart beste traseen. Denne har tidlegare fått kritikk for å vere for dyr med ein prislapp på 33 milliardar.

– Vi kan ikkje leike med liva våre på denne måten. Det er for mange farar på strekninga i dag, mellom anna 29 rasfarlege område. Det er russisk rulett, og vi kan ikkje reknar pengar i liv, seier Himle.

• LES OGSÅ: Held fast på trasé til 33 milliardar

Kan bli kø som følgje av aksjonen

Himle fortel at fleire kvir seg på å køyre strekninga etter dei mange rasa. Ho håpar difor mange vil vise si støtte under aksjonen på søndag.

– Så langt synest eg responsen har vore kjempebra. Mange har engasjert seg i saka tidlegare, og eg håpar dei også viser det ved å stille på søndag, seier Himle.

I skrivande stund har 225 sagt dei vil delta på Facebook. Himle åtvarar bilistar om at aksjonen kan føre til kø rundt Stanghelle søndag ettermiddag.

– Eg vil oppfordre folk til å ta omsyn og planlegge for at det kan bli kø den dagen, seier Himle.

• LES OGSÅ: Mener E16 er viktigere enn fergefri E39