– Støttegruppa vil vere ved dei forskjellige minnesmerka, i Sund kommune, i Kleppestø på Askøy, og på Osterøy, seier Jonny Bjorheim som er styreleiar i støttegruppa til råka etter 22. juli.
- Les òg:
- Les òg:
I Sund er markeringa klokka 9.30 ved Stranda skule, klokka 11.00 på ved Vatnavatnet på Kleppestø på Askøy, og klokka 14.00 ved rådhuset på Osterøy.
I tillegg kjem AUF-medlemmar i Hordaland til å legge ned roser og tenne lys ved Den blå steinen klokka 12. Det blir òg ei minnemarkering i regi av Askøy AUF og Ap ved Vatnavatnet klokka 17.
Bjorheim seier minnemarkeringane betyr mykje for dei etterlatne.
– Korleis det blir markert er opp til den enkelte, nokon vil vere på samlingane her i Hordaland, og nokon reiser til Utøya og er der, seier Bjorheim.
Viktig støtte
Bjorheim si dotter er ein av dei som overlevde Utøya, og Bjorheim seier det er viktig at støttegruppa finst.
– Det er mange som er med aktivt. Støttegruppa har ein del arrangement i løpet av året kvar me samlast, og det er det som kanskje er det viktigaste, at du har den likemannsstøtta frå andre som har vore i same situasjon, som skjønar kva ein har vore gjennom, seier Bjorheim.
– Det er viktig å minnast dei som gjekk vekk for tre år sidan, seier han.
Trond Blattmann som er leiar i den nasjonale støttegruppa for 22. juli, seier denne dagen kjem til å vere ein merkedag i mange år framover.
– Det er viktig å markere denne hendinga og viktig å vere saman den dagen for å minnast dei me mista både i regjeringskvartalet og på Utøya, seier Blattmann.